Martyr sancta*

Gloriosa et beatissima Christi martyr Afra quae per florem paradisi pretiosum praesulem Narcissum divinitus medicata mortiferum idolatriae et priscae turpitudinis morbos evasisti teque ipsam vivum et illibatum domino holocaustum per ignem passionis obtulisti nos quaesumus quamvis sordidos quamvis peccatores tui nunc memoriam venerantes sereno vultu respice et cum beatis martyrii tui consortibus pro nostris reatibus intercede

Vigili corde dominum adorantes venite qui a sordibus purgatam sanctis martyribus beatam sociavit Afram

Cum sub Diocletiano tyranno saeva persecutionis tempestas Christi turbaret ecclesias beatus praesul Narcissus domino favente vindelicam venit Augustam

In qua civitate cum puellis suis veneris sacris dedita tunc turpis sed postmodum sanctissima habitabat Afra

Cujus prostibulum cum Felice diacono suo sanctus praesul ignorans ingressus pacem domui imprecatur benigneque quasi pro turpi amatore suscipitur

Cum psalmis deo et hymnis sancti viri vota persolverent Afra stupens et tremebunda insoliti quid sibi hospites velint est admirata

Audiens vero beatum virum christianorum esse antistitem pedibus ejus prosternitur se turpem se peccatricem talique indignam hospite profitetur

Quam vir sanctus verbis evangelicis consolatur ad paenitentiam et conversionem cohortatur eique si credere et baptizari velit veniam et vitam aeternam pollicetur

Beatus pontifex Narcissus cum beatas feminas gratia divina praeventas capaces verbi persensisset toto nisu fructices errorum exstirpare et veritatis frugem studuit inserere

Domino pro ipsis supplicans et verbum vitae eis annuntians

Sancto praesule precibus obnixius insistente daemon nigerrimus et horrore plenus apparuit ac se injuria suis e sedibus pelli proclamabat

Mundi cordis amatorem nil in tam sordidis habere vasis protestatur

Hostis antiquus caelesti virtute et rationum veritate confutatus victus tandem aufugit et deditas jam Christo feminas ejulans reliquit

Coactus a sancto pontifice mortiferum in faucibus alpium draconem perimere

Sancto pontifice in divinis laudibus pernoctante lux caelitus emissa et tenebras noctis excussit et cor Afrae splendore fidei illuminavit

Cumque dulcem sanae doctrinae saporem praegustasset Afra puellas suas allocuta promptas eas ad viam vitae pedisequas invenit

Afra priscam Rahab Jerichontem secuta veri Jesu legatos ad supplicium a persecutoribus requisitos sub lini fasciculis supernae civitatis futura civis occultavit

Imbuta verae fidei rudimentis Afra quaeque a sancto hospite salutaria percepit matri suae Hilariae fideliter indicavit

Quae beatum virum noctu ad se transmissum gratulabunda suscipiens pedes ejus amplectitur vitaeque prioris miseros errores confitetur

Auditis praesul sanctus turpissimis ab Hilaria daemonum culturis gemens et lacrimas fundens pias cum diacono suo pro tanto errore domino preces effudit

Propulso post longum conflictum prisci erroris persuasore vir domini Narcissus beatas mulieres fide Christi plenius instruxit et salutari lavacro paenitentia et jejuniis praeparari fecit

Familiam totam cognatos affines et amicos

Cum fontem vitae sitientes et fide alacres perspexisset sanctus pontifex domino gratias referens Christi baptismo gaudentes abluit omnes

Vasa prius irae in vasa emundans misericordiae

Mox omnibus in fide Christi confortatis avunculum Afrae Dionysium episcopum eis praefecit et domum Hilariae ecclesiam de…

…dicavit

Ut ubi spurca pridem commercia Christi deinceps frequentarentur mysteria

Gratias tibi domine Jesu referimus immensas quia in beata martyre Afra ubi abundavit iniquitas superabundavit et gratia tua

Postquam novellam conversa Afra beatus Narcissus Augustae fundavit ecclesiam novam domino lucraturus familiam Hispaniarum urbem adiit Gerundam

Ubi cum Felice diacono suo feliciter martyrium consummavit

Fervente interim immani persecutionis saevitia beata Afra comprehenditur et Gaii judicis tribunalibus praesentatur

Gaudens et tripudians coronamque martyrii adipisci desiderans

Martyr sancta dei quae flagrans igne fidei flammas sprevisti tortorum victima Christi qui foedant mores precibus restingue calores

Crescat ut in nobis divini fervor amoris

Multis hinc inde sermonum conflictationibus habitis multis blandicus minis et terroribus incassum consumptis beata martyr interrita permanens omnia pro Christo perpeti tormentorum genera desiderabat

Christum libere confitens Christum ardenter sitiens dissolvi et esse cum Christo cupiens

Invicta Christi testis Afra variis a judice Gaio modis attentata ab agnitae veritatis confessione nulla potuit deterri ratione

Constans animo persistens et libera tyrannum voce confundens crudeli postremo sententia viva ignibus est sancta martyr addicta

In quandam itaque Lici fluminis insulam ducta ardentem flammis crepitantibus pyram laeta conspicatur et ut a pristinis per hanc sordibus expurgari mereretur suppliciter salvatoris mundi pietatem precatur

Ignium flammis circumdata dominum hymnizans benedixit et inter gratiarum actiones martyrio candidatum caelo spiritum reddidit

Sancti corporis reliquias beatae ejus puellae a flumine reductas flebiles cum amicis exsequias celebrantes sepelierunt et super eam aediculam vilibus ex lignis construxerunt

Cum ad martyris sepulcrum Christo vota reddentes beatae convenissent mulieres jussu tyranni ad cultum idolorum a tortoribus frustra sunt coactae et fortes in fide mox ignibus suppositis concrematae ad martyrii triumphum et ipsae pariter pervenere

Sancto pontifice*

Cumque dulcem*

Afra priscam*

Gratias*

Invicta*

Multis hinc*

O mirandam et laudandam mutationem dexterae excelsi quam in beatis martyribus quarum venerandam recolimus memoriam domine Jesu Christe misericorditer ostendisti pro qua debitas tibi grates referentes supplicamus ut ipsarum meritis suffragantibus nos de vitiis ad virtutes mutare et in adoptionem filiorum dei digneris transformare

Veni sponsa Christi*

Veni electa mea*

Qui Chananaeam suscepit et publicanum Mariam consolatus est Magdalenam Petrum quoque respexit flentem ipse per clementiam visitavit et Afram

Regem martyrum*

Fallax gratia et vana est pulchritudo mulier timens dominum ipsa laudabitur

Multae filiae congregaverunt divitias Afra martyr Christum metuens supergressa est possidentes

Fecit sibi amicos de mammona iniquitatis ideoque recepta est in aeternis tabernaculis

Qui se pro peccantibus dixit advenisse errabundae condoluit Afrae quam pio flore voluit Narcisso medicare

Ingressus lupanar praesul ignorans pacem imprecans domui meruit exaudiri

Cumque noctis excubias divina laude continuat tremor Afram occupat admirantem quid velit quod eam talis hospes adiit

Orante beato praesule Narcisso venit lumen clarum de caelo quod excussit tam noctis tenebras quam de corde Afrae perfidiae nebulas

De nocte surrexit ignorantiae dedit praedam verbi domesticis et cibaria fidei ancillis suis

Hospes iste sanctus promittit nobis quia si credamus Christo salvemur et si baptizemur a culpa mundemur

Respondent tres puellae Eunomia Digna et Eutropia si te secutae sumus ad carnis ludibria quare non sequamur ad vitae remedia

Afra prudens ut Rahab Jerichontis legatos Jesu veri abscondit sub fascibus lini stola perenni cupiens indui

Gustata veritatis dulcedine Afra sollicita pro genetrice per noctem verbisatorem transmigrat ad Hilariam

Suscepit laetabunda Narcissum Hilaria pedes complexa errores confessa

Cumque tempus opportunum fuisset nactus Narcissus instanter evellit spinas et fecundis semen inserit arvis

Credidit Afra lucratur Hilaria baptizatur omnis familia templum Christi fit domus ipsa

Saevientem praefectum Afra confudit dicens hoc corpus quod peccavit quibus vis poenis attrecta animam vero idolorum cultu non inquinabo

Spiritu confirmata judici respondit Afra videntur nimis gravia mihi quae ignorans deum gessi sed agnita veritate numquam redibo retrorsum

Capitolium meum Christus est cui corde credo et ore confiteor etsi non sum digna sacrificare cupio illi ipsa immolari

Cumque martyr duceretur ut ignibus combureretur expansis manibus et oculis caelo intentis suppliciter orabat dicens domine qui ut ipse dixisti non justos sed peccatores vocare venisti propter ingenitam tibi clementiam suscipe meam modo paenitentiam ut per ignem hunc temporalem evadere merear poenam aeternalem

Fallax gratia*

Multae filiae*

Qui se pro peccantibus*

Afra p-*

Pulchra facie*

Gratias tibi ago pie pastor Jesu Christe qui me hostiam tibi esse decrevisti qui teipsum pro salute mundi patri sacrificium obtulisti justus pro injustis innocens pro damnatis et peccati expers pro peccatoribus universis