Catharinae collaudemus virtutum insignia cordis ei praesentemus et oris obsequia ut spe certa respiremus per ejus suffragia

Fulta fide Catharina judicem Maxentium non formidat lex divina sic firmat eloquium quod confutat ex doctrina doctores gentilium

Victi Christum confitentur relictis erroribus judex jubet ut crementur nec pilis nec vestibus nocet ignis sed torrentur inustis corporibus

Post haec blandis rex molitur virginem seducere nec promissis emollitur nec terretur verbere compeditur custoditur taetro clausa carcere

Clausae lumen ne claudatur illucet Porphyrio qui reginae foederatur fidei collegio quorum fidem imitatur ducentena contio

Hujus ergo contionis concordes constantia vim mundanae passionis pari patientia superemus ut cum bonis laetemur in gloria amen

Pange lingua gloriosae virginis martyrium gemmae jubar pretiosae descendat in medium ut illustret tenebrosae mentis domicilium

Imminente passione virgo haec interserit assequatur Jesu bone quod a te petierit suo quisque in agone memor mei fuerit

In hoc caput amputatur fluit lac cum sanguine angelorum sublevatur corpus multitudine et Sinai collocatur in supremo culmine

Hoc declarat hoc explanat meritum virgineum quod ex ejus tumba manat incessanter oleum cujus virtus omnis sanat doloris aculeum

Vim doloris corporalis ut haec sanat unctio sic liquoris spiritalis mundet nos infusio et aeterno temporalis dolor cedat gaudio amen

Virginis eximiae Catharinae martyris almae festa celebrare da nobis rex pie Christe

Haec mundum spernens et mundi florida ducens pro nihilo veram studuit cognoscere vitam

Coepit amare deum totumque relinquere mundum caelica mente petens et Christo semper adhaerens

Hanc pius in propriam sibi Christus sumere sponsam dignatus caeli provexit ad atria summi

Jam Christi thalamum scandit Catharina beatum juncta suo sponso pro quo tulit aspera mundo

O Christi pietas o virtus atque potestas virginis ex membris sacri fluit unda liquoris unde fides aegris infundit dona salutis

Virginis ob meritum manet hoc memorabile signum

Gloria patri et filio et spiritui sancto*

O Christe virginum gloria | Sponsus palma et victoria | Te virgo beata cernit hodie Catharina in patris dextera | Obtinet ut sponsa tua gaudia ejus praesta nobis per merita dona salutis

Catharinae collaudemus*

Specie tua*

Inclyta sanctae virginis Catharinae sollemnia suscipiat alacriter sancta mater ecclesia ave virgo deo digna ave dulcis et benigna obtine nobis gaudia quae possides cum gloria

Adoretur virginum rex in saeculorum saecula virgini qui Catharinae contulit caelestia

Pange lingua*

Virgo sancta Catharina Graeciae gemma urbe Alexandria Costi regis filia

Specie corporis decora nimis enituit sed fide pulchrior sponso superno placuit

Traditur ergo a patre doctoribus praecipius instruenda liberalibus studiis

Specie tua et*

Nobilis et pulchra prudens Catharina puella flagrat amore dei spernit vaga gaudia mundi

Cui rex carne pater fuerat reginaque mater

Martyrium sitiens libamina Caesaris horrens exclamat Christum praeter quem nil venerandum

Daemoniis plena sunt haec ait idola templi

Haec quinquagenos oratores superatos dirigit ad caelos aurum velut igne probatos

Efficiens testes fidei quos pertulit hostes

Gloria patri et filio et spiritui sancto*

Cum esset adhuc in annis virgo puerilibus caris orbata parentibus mundi renuntiavit opibus

Maxentius instat impius dum idolorum cultibus puella voce libera haec sunt clamat daemonia et Jesum te Christe solum praedicat os virgineum

Caesar electos convocat rhetores et grammaticos adversus illam disputaturos quos vincens virgo Christi fidem docuit et martyres dignos deo exhibuit

Adjuvabit eam*

Impius hanc Caesar sisti jubet ante tribunal hanc ut pervertat sicut draco vel leo certat

Illa manet constans nec blanda nec aspera curans

Virgo flagellatur crucianda fame relegatur carcere clausa manet lux caelica fusa refulget fragrat odor dulces cantant caeli agmina laudes

Sponsus amat sponsam salvator visitat illam

Horrendo subdenda rotarum machinamento virgo deum clamat de caelis angelus astat ecce repentinam dant plebsque rotaeque ruinam

Tamquam Chaldaeis quondam fornax Babylonis

Gloria patri et filio et spiritui sancto*

Gloriosam virginem tyrannus flagellari imperat et crucianda fame in carcere recludi cui escam per columbam Christus fecit ministrari

Illa deo dum agit gratias in tenebris lux emicat flagrat odor vincens balsama adest et contio angelica lacero corpori caelestia adhibens medicamina

Cum coetu virgineo adveniens salvator sponsus sponsam pie visitat consolatur et roborat constans esto ait filia tecum ego sum nil paveas

Diffusa est gratia in labiis tuis*

Percusso gladio dat lac pro sanguine collo quam manus angelica sepelivit vertice Sina

Membris virgineis olei fluit unda salubris

O quam felices per te sanctissima plures quos jubet occidi pro Christo turbidus hostis

Cum duce Porphyrio fit martyr Caesaris uxor

O mater nostra ter sancta quaterque beata cum prece devota famulantum suscipe vota

Jam Christo juncta sponsoque suo sociata

Gloria patri et filio et spiritui sancto*

Aeternae virgo memoriae quam sibi despondit rex gloriae | Virginis proles eximiae sponsusque virginis ecclesiae | Tu gaudes hodie de dono gratiae | Et cantas in caelo carmen laetitiae | Te laudantes in terra respice | Atque nostra clementer suscipe vota

Elegit eam deus*

Passionem gloriosae virginis Catharinae devote plebs celebret fidelis quae sui memores deo commendat meritis et juvat beneficiis

Post plurima supplicia martyr alma ad decollandum est ducta ad caelum manus oculos tendens collum sub jugulo orat dans gloriam deo

Exspecto pro te gladium Jesu rex bone tu meum da paradiso spiritum et fac misericordiam meam agentibus memoriam

Vox de caelis intonuit veni dilecta jam veni intra thalamum sponsi tui quod postulas impetrasti pro quibus oras salus erit

Quia devotis laudibus tua sollemnia virgo recolimus o beata Catharina ora pro nobis quaesumus

Catharinae collaudemus*

Elegit eam*

Benedictus dominus rex caelestis qui per merita beatae Catharinae virginis medelam languidis praestat sanitatis ipsius corporis oleo fideliter perunctis

Passionem*

O mater nostra*

Catharinae*

Elegit eam*

Prudens et vigilans virgo qualis es cum sponso illo qui te elegit de mundo quam pulchra quam mirabilis quanta luce spectabilis es inter Sion juvenculas et Jerusalem filias thalamo gaudes regio conjuncta dei filio