Gloria patri et filio et spiritui sancto sicut era in principio

Gloria patri et filio et spiritui sancto

O antiqui sancti quid admiramini in nobis verbum dei clarescit in forma hominis et ideo fulgemus cum illo aedificantes membra sui pulchri corporis

Nos sumus radices et vos rami fructus viventis oculi et nos umbra in illo fuimus

O nos peregrinae sumus quid fecimus ad peccata deviantes filiae regis esse debuimus sed in umbram peccatorum cecidimus o vivens sol porta nos in umeris tuis in justissimam hereditatem quam in Adam perdidimus o rex regum in tuo proelio pugnamus

O dulcis divinitas et o suavis vita in qua perferam vestem praeclaram illud accipiens quod perdidi in prima apparitione ad te suspiro et omnes virtutes invoco

O felix anima et o dulcis creatura dei quae aedificata es in profunda altitudine sapientiae dei multum amas

O libenter veniam ad vos ut praebeatis mihi osculum cordis

Nos debemus militare tecum o filia regis

O gravis labor et o durum pondus quod habeo in veste hujus vitae quia nimis grave mihi est contra carnem pugnare

O anima voluntate dei constituta et o felix instrumentum quare tam flebilis es contra hoc quod deus contrivit in virginea natura tu debes in nobis superare diabolum

Succurite mihi adjuvando ut possim stare

Vide quid illud sit quo es induta filia salvationis et esto stabilis et numquam cades

O nescio quid faciam aut ubi fugiam o vae mihi non possum perficere hoc quod sum induta certe illud volo abicere

O infelix conscientia o misera anima quare abscondis faciem tuam coram creatore tuo

Tu nescis nec vides nec sapis illum qui te constituit

Deus creavit mundum non facio illi injuriam sed volo uti illo

Fatue fatue quid prodest tibi laborare respice mundum et amplectetur te magno honore

O plangens vox est haec maximi doloris ach ach quaedam mirabilis victoria in mirabili desiderio dei surrexit in qua delectatio carnis se latenter abscondit heu heu ubi voluntas crimina nescivit et ubi desiderium hominis lasciviam fugit luge luge ergo in his innocentia quae in pudore bono integritatem non amisisti et quae avaritiam gutturis antiqui serpentis ibi non devorasti

Quae est haec potestas quod nullus sit praeter deum ego autem dico qui voluerit me et voluntatem meam sequi dabo illi omnia tu vero tuis sequacibus nihil habes quod dare possis quia etiam vos omnes nescitis quid sitis

Ego cum meis sodalibus bene scio quod tu es ille antiquus draco qui super summum volare voluisti sed ipse deus in abyssum projecit te

Nos autem omnes in excelsis habitamus

Ego humilitas regina virtutum dico venite ad me virtutes et enutriam vos ad requirendam perditam drachmam et ad coronandum in perseverantia felicem

O gloriosa regina et o suavissima mediatrix libenter venimus

Ideo dilectissimae filiae teneo vos in regali thalamo

Ego caritas flos amabilis venite ad me virtutes et perducam vos in candidam lucem floris virgae

O dilectissime flos ardenti desiderio currimus ad te

Ego timor dei vos felicissimas filias praeparo ut inspiciatis in deum vivum et non pereatis

O timor valde utilis es nobis habemus enim perfectum studium numquam a te separari

Euge euge quis est tantus timor et quis est tantus amor ubi est pugnator et ubi est remunerator vos nescitis quid colitis

Tu autem exterritus es per summum judicem quia inflatus superbia mersus es in Gehennam

Ego lucida oboedientia venite ad me pulcherrimae filiae et reducam vos ad patriam et ad osculum regis

O dulcissima vocatrix nos decet in magno studio pervenire ad te

Ego fides speculum vitae venerabiles filiae venite ad me et ostendo vobis fontem salientem

O serena speculata habemus fiduciam pervenire ad verum fontem per te

Ego sum dulcis conspectrix viventis oculi quam fallax torpor non decipit unde vos o tenebrae non potestis me obnubilare

O vivens vita et o suavis consolatrix tu mortifera mortis vincis et vidente oculo clausuram caeli aperis

O virginitas in regali thalamo stas o quam dulciter ardes in amplexibus regis cum te sol perfulget ita quod nobilis flos tuus numquam cadet o virgo nobilis te numquam inveniet umbra in cadente flore

Flos campi cadit vento pluvia spargit eum o virginitas tu permanes in symphoniis supernorum civium unde es suavis flos qui numquam aresces

Fugite oves spurcitias diaboli

Has te succurrente fugiemus

Ego contemptus mundi sum candor vitae o misera terrae peregrinatio in multis laboribus te dimitto o virtutes venite ad me et ascendamus ad fontem vitae

O gloriosa domina tu semper habes certamina Christi o magna virtus quae mundum conculcas unde etiam victoriose in caelo habitas

Ego aurea porta in caelo fixa sum qui per me transit numquam amaram petulantiam in mente sua gustabit

O filia regis tu semper es in amplexibus quos mundus fugit o quam suavis est tua dilectio in summo deo

Ego sum amatrix simplicium morum qui turpia opera nesciunt sed semper in regem regum aspicio et amplector eum in honore altissimo

O tu angelica socia tu es valde ornata in regalibus nuptiis

Ego obtenebro et fugo atque conculco omnes spurcitias diaboli

Tu es in aedificatione caelestis Jerusalem florens in candidis liliis

O quam amara est illa duritia quae non cedit in mentibus misericorditer dolori succurrens ego autem omnibus dolentibus manum porrigere volo

O laudabilis mater peregrinorum tu semper erigis illos atque ungis pauperes et debiles

Ego victoria velox et fortis pugnatrix sum in lapide pugno serpentem antiquum conculco

O dulcissima bellatrix in torrente fonte qui absorbuit lupum rapacem o gloriosa coronata nos libenter militamus tecum contra illusorem hunc

Ego discretio sum lux et dispensatrix omnium creaturarum in differentia dei quam Adam a se fugavit per lasciviam morum

O pulcherrima mater quam dulcis et quam suavis es quia nemo confunditur in te

Ego sum columna quae molliri non potest quia fundamentum meum in deo est

O firma quae stas in caverna petrae et o gloriosa bellatrix quae suffers omnia

O filiae Israel sub arbore suscitavit vos deus unde in hoc tempore recordamini plantationis suae gaudete ergo filiae Sion

Heu heu nos virtutes plangamus et lugeamus quia ovis domini fugit vitam

O vos regales virtutes quam speciosae et quam fulgentes estis in summo sole et quam dulcis est vestra mansio et ideo o vae mihi quia a vobis fugi

O fugitive veni veni ad nos et deus suscipiet te

Ach ach fervens dulcedo absorbuit me in peccatis et ideo non ausa sum intrare

Noli timere nec fugere quia pastor bonus quaerit in te perditam ovem suam

Nunc est mihi necesse ut suscipiatis me quoniam in vulneribus feteo quibus antiquus serpens me contaminavit

Curre ad nos et sequere vestigia illa in quibus numquam cades in societate nostra et deus curabit te

Ego peccator qui fugi vitam plenus ulceribus veniam ad vos ut praebeatis mihi scutum redemptionis

O tu omnis militia reginae et o vos candida lilia ipsius cum rosea purpura inclinate vos ad me quia peregrina a vobis exulavi et adjuvate me ut in sanguine filii dei possim surgere

O anima fugitiva esto robusta et indue te arma lucis

Et o vera medicina humilitas praebe mihi auxilium quia superbia in multis vitiis fregit me multas cicatrices mihi imponens nunc fugio ad te et ideo suscipe me

O omnes virtutes suscipite lugentem peccatorem in suis cicatricibus propter vulnera Christi et perducite eum ad me

Volumus te reducere et nolumus te deserere et omnis caelestis militia gaudet super te ergo decet nos in symphonia sonare

O misera filia volo te amplecti quia magnus medicus dura et amara vulnera propter te passus est

O vivens fons quam magna est suavitas tua qui faciem istorum in te non amisisti sed acute praevidisti quomodo eos de angelico casu abstraheres qui se aestimabant illud habere quod non licet sic stare unde gaude filia Sion quia deus tibi multos reddit quos serpens de te abscidere voluit qui nunc in majori luce fulgent quam prius illorum causa fuisset

Quae es aut unde venis tu amplexata es me et ego foras eduxi te sed nunc in reversione tua confundis me ego autem pugna mea deiciam te

Ego omnes vias meas malas esse cognovi et ideo fugi a te modo autem o illusor pugno contra te

Inde tu o regina humilitas tuo medicamine adjuva me

O victoria quae istum in caelo superasti curre cum militibus tuis et omnes ligate diabolum hunc

O fortissimi et gloriosissimi milites venite et adjuvate me istum fallacem vincere

O dulcissima*

Ligate ergo istum o virtutes praeclarae

O regina nostra tibi parebimus et praecepta tua in omnibus adimplebimus

Gaudete o socii quia antiquus serpens ligatus est

Laus tibi Christe rex angelorum

In mente altissimi o Satana caput tuum conculcavi et in virginea forma dulce miraculum colui ubi filius dei venit in mundum unde dejectus es in omnibus spoliis tuis et nunc gaudeant omnes qui habitant in caelis quia venter tuus confusus est

Tu nescis quid colis quia venter tuus vacuus est pulchra forma de viro sumpta ubi transis praeceptum quod deus in suavi copula praecepit unde nescis quid sis

Quomodo posset me hoc tangere quod tua suggestio polluit per immunditiam incestus unum virum protuli qui genus humanum ad se congregat contra te per nativitatem suam

O deus quis es tu in temetipso hoc magnum consilium habuisti quod destruxit infernalem haustum in publicanis et peccatoribus qui nunc lucent in superna bonitate unde o rex laus sit tibi

O pater omnipotens ex te fluit fons in igneo amore perduc filios tuos in rectum ventum velorum aquarum ita ut et nos eos hoc modo perducamus in caelestem Jerusalem

In principio omnes creaturae viruerunt in medio flores floruerunt postea viriditas descendit et istud vir proeliator vidit et dixit hoc scio sed aureus numerus nondum est plenus tu ergo paternum speculum aspice in corpore meo fatigationem sustineo parvuli etiam mei deficiunt nunc memor esto quod plenitudo quae in primo facta est arescere non debuit et tunc in te habuisti quod oculus tuus numquam cederet usque dum corpus meum videres plenum gemmarum nam me fatigat quod omnia membra mea in irrisionem vadunt pater vide vulnera mea tibi ostendo ergo nunc omnes homines genua vestra ad patrem vestrum flectite ut vobis manum …

[Tota die contristatus ingrediebar] domine quoniam anima mea completa est illusionibus et vim faciebant qui quaerebant animam meam

Et qui inquirebant mala mihi locuti sunt vanitates et dolos tota die meditabantur

Adjutor et susceptor meus tu es domine et in verbum tuum speravi declinate a me maligni et scrutabor mandata dei mei

Eripe me de inimicis meis deus meus et ab insurgentibus in me libera me

In proximo est tribulatio mea domine et non est qui adjuvet ut fodiant manus meas et pedes meos libera me de ore leonis ut narrem nomen tuum fratribus meis

Deus deus meus respice in me quare me dereliquisti longe a salute mea

Ego gloriam meam non quaero est qui quaerat et judicet

Deus deus meus respice in me R. Quare me dereliquisti longe a salute mea

Doceam iniquos vias tuas et impii ad te convertentur libera me de sanguinibus deus salutis meae

Domine labia mea aperies et os meum annuntiabit laudem tuam

Ne avertas faciem tuam a puero tuo domine quoniam tribulor velociter exaudi me