Si iniquitates observaveris domine domine quis sustinebit

Opera manuum tuarum domine ne despicias

Requiem aeternam*

Audivi vocem de caelo dicentem beati mortui qui in domino moriuntur

Dirige domine deus meus in conspectu tuo viam meam

Convertere domine et eripe animam meam quoniam non est in morte qui memor sit tui

Nequando rapiat ut leo animam meam dum non est qui redimat qui salvum faciat

Requiem aeternam*

Qui Lazarum resuscitasti ad monumento foetidum tu eis domine dona requiem et locum indulgentiae

Requiem aeternam dona eis domine

Credo quod redemptor meus vivit et in novissimo die de terra surrecturus sum et in carne mea videbo deum salvatorem meum

Quem visurus sum ego ipse et non alius et oculi mei conspecturi sunt

Heu mihi domine quia peccavi nimis in vita mea quid faciam miser ubi fugiam nisi ad te deus meus miserere mei dum veneris in novissimo die

Anima mea turbata est valde sed tu domine succurre ei

In loco pascuae ibi me collocavit

Delicta juventutis meae et ignorantias meas ne memineris domine

Credo videre bona domini in terra viventium

Anima mea turbata est*

Ne recorderis peccata mea domine dum veneris judicare saeculum per ignem

Amplius lava me domine ab injustitia mea et a delicto meo munda me

Domine quando veneris judicare terram ubi me abscondam a vultu irae tuae quia peccavi nimis in vita mea

Commissa mea pavesco et ante te erubesco dum veneris judicare noli me condemnare

Peccante me cottidie et non repaenitentem timor mortis conturbat me quia in inferno nulla est redemptio miserere mei deus et salva me

Deus in nomine tuo salvum me fac et in virtute tua libera me

Complaceat tibi domine ut eripias me ad adjuvandum me festina

Sana domine animam meam quia peccavi tibi

Sitivit anima mea ad deum vivum quando veniam et apparebo ante faciem domini

Domine secundum actum meum noli me judicare nihil dignum in conspectu tuo egi ideo deprecor majestatem tuam ut tu deus deleas iniquitatem meam

Quoniam iniquitatem meam ego agnosco et delictum meis coram me est semper tibi soli peccavi

Quomodo confitebor tibi domine quando veneris in judicium tuum quia cor meum mundum non custodivi animam meam in carne positam pollui templum corporis mei de opere iniquitatis coinquinavi precor te domine antequam discutias me miserere mei

Tibi soli peccavi et malum coram te feci

Absolve domine animam ejus ab omni vinculo delictorum non eam tormentum mortis attingat non reorum cathena constringat sed miseratio tua in pacis eam ac lucis regione constituat

Si quae illi sunt domine digne cruciatibus culpae tu ei gratia lenitatis indulge

Libera me domine de viis inferni qui portas aereas confregisti et visitasti infernum et dedisti eis lumen ut viderent te qui erant in poenis tenebrarum

Clamantes et dicentes advenisti redemptor noster

Libera me domine de morte aeterna in die illa tremenda quando caeli movendi sunt et terra dum veneris judicare saeculum per ignem

Dies illa dies irae calamitatis et miseriae dies magna et amara valde

Plangent se super se omnes tribus terrae vix justus salvabitur et ego miser ubi parebo

Quid ego miserrimus quid dicam vel quid faciam cum nil boni perferam ante tantum judicem

Lacrimosa dies illa qua resurget de favilla judicandus homo reus pro peccatis parce deus

Dolens ego pro meis sceleribus et turbatus judicii terroribus oro Jesu judex pie noli me condemnare

Vox de caelis o vos mortui qui jacetis in sepulcro surgite et occurrite ad judicium salvatoris

Audivi vocem de caelo dicentem*

Exsultabunt domino ossa humiliata

Exaudi domine orationem meam ad te omnis caro veniet

Me suscepit dextera tua domine

Eruisti domine animam meam ne periret

Omnis spiritus laudet dominum

Requiem aeternam dona eis*

Omne quod dat mihi pater ad me veniet et eum qui venit ad me non ejiciam foras

Kyrie eleison

Qui Lazarum*

Requiem*

Heu mihi*

Anima mea*

Libera me domine*

Creator omnium rerum deus qui me de limo terrae formasti et mirabiliter sanguine proprio redemisti corpusque meum licet modo putrescat de sepulcro facias in die judicii resuscitari exaudi exaudi exaudi me ut animam meam in sinu Abrahae patriarchae tui jubeas collocari

Libera me*

In paradisum deducant te angeli in suo conventu suscipiant te martyres et perducant te in civitatem sanctam Jerusalem

Aperite illi portas justitiae ingressus in eas confitebor domino haec porta domini justi intrabunt in ea

Ingrediar in locum tabernaculi admirabilis usque ad domum dei

Haec requies mea in saeculum saeculi hic habitabo quoniam elegi eam

De terra plasmasti me et carne induisti me redemptor meus domine et resuscita eum in novissimo die

Non intres in judicium cum servo tuo domine quia non justificabitur in conspectu tuo omnis vivens

Omnis spiritus*

Requiem aeternam dona eis domine*

Omne quod*

Impleta sunt*