Emitte agnum*
Emitte agnum domine dominatorem terrae de petra deserti ad montem filiae Sion
Ostende nobis domine misericordiam tuam et salutare tuum da nobis
Germinaverunt campi eremi germen odoris Israel quia ecce deus noster cum virtute veniet et splendor ejus cum eo
Ex Sion species decoris ejus deus noster manifeste veniet
Paratus esto Israel in occursum domini quoniam venit formans montes et creans spiritus et annuntians in hominibus Christum esse venturum
Ecce dominator dominus cum virtute veniet
Consolamini consolamini popule meus dicit deus vester
Laetamini cum Jerusalem et habitate cum ea omnes qui diligitis eam in aeternum
Ponent domino gloriam et laudem ejus in insulis nuntiabunt quia ecce veniet et non tardabit alleluia
Exspectetur sicut pluvia eloquium domini et descendat super nos sicut ros deus noster
Dabit illi dominus sedem David patris ejus et regnabit in aeternum
Omnis vallis implebitur et omnis mons et collis humiliabitur et videbit omnis caro salutare dei