Salve festa dies et celeberrima quae nobis replicas annua gaudia patris Gaugerici praesulis inclyti quo concive polus gaudet amabilis

Alternans igitur nostra catervula laudes atque modos personet inclytos attollatque patrem Cameracensium magnum pontificem sanctissimum virum

Hic virtute cluens ut medicus potens curavit gemina peste misellulum quem diversicolor lepra notaverat gentilisque furor excerebraverat

Allidens precibus ferrea vincula nexos eripuit terque decennibus sopitos oculos noctibus excitans infuso penitus sole retexerat

Praeter quod domini propalat angelus quanti sit meriti tantus episcopus cui mox exhibitus fit bacularius dum de more pias explicuit preces

Confessor domini vir venerabilis laudes quas canimus suscipe quaesumus et nostris veniam lapsibus impetra et tecum superam scandere patriam

Laus patri domino laus quoque filio laus et perpetuo spiritui sacro laus trinae monadi summaque gloria laus simplae triadi saecla per omnia Amen

Animarum Christi fidelis institor Gaugericus dum cujusdam mercatoris vinculis astrictos pueros venales cerneret nec eorum absolutionem obtinere posset solitae orationis malleo vincula fregit et captivos filiis ecclesiae sociavit

Fortis sermone dei miles Gaugericus fortior fide

Gloria patri et filio et spiritui sancto

Ora pro nobis beate pater Gaugerice R. Ut digni efficiamur

Meritis sacris et praecipue exsultantes patrociniis beatissimi Gaugerici festa celebremus ut nos ab angore saeculi exemptos gaudiis patriae faciat intercessae caelestis