Austria laetare vere felix regio quae summis collocatum principibus laudans Leopoldum Marchionem piissimum

Eia nunc dominum laudent universae familiae gentium qui veritatem et misericordiam confirmavit super gloriosissimum Leopoldum principem suum

Injuriam passis justitiam Leopoldus ministravit caecos ducens elisos erigens compeditos solvens famelicos pavit

Omnes sanans contritos ligans stellarum nomina vocans magnae virtutis et sapientiae dominus mansuetum ad se suscepit ovans Leopoldum

Ubique fines tuos pax possedit o Austria Leopoldo te gubernante quae in melius reformabitur confidito Innocentio ipsum sublimante

Exsultate in rege*

Lux visa*

Gloria et honore*

Fortissime deus cujus potentia ex nihilo creata sunt omnia cujus sapientia rite gubernantur universa cujus clementia nostra pie relevatur miseria cujus justitia aequissime reddet cuique secundum opera sua quaesumus votis beati Leopoldi nostri patroni consequi ut nos potenter defendas in finem optandum dirigas misericorditer nobiscum agas et tandem juste non aestimator meriti sed solita potius pietate nobis beatitudinem concedas

Per summae venerationis obsequium magnum colamus Leopoldi dominum

Lux visa*

Legem domini meditatus est Leopoldus noctes atque dies quare voluntas ejus optima fructum dare voluit meritorium

Eruditus terrena Leopoldus judicavit quia domino servivit in timore exsultans ei qui summa majestas est cum tremore

Omnes adversantes Leopoldo percussit dominus quia per ipsum etiam filios contrivit hominum dentes daemoniorum

Gloria et honore*

Claustri saepta quibus servi et ancillae dei ne in viam abeant mundanorum ultro mancipantur sanctus erigebat Leopoldus et plura in Austria fundavit atque dotavit monasteria ad militandum in eis deo sub beatorum Augustini et Benedicti regulis valde securis

Quarum jugum suave et onus leve dei non gravat diligentes

Novi sollemnitas praeconis nostri non cassa nostras instruit mentes qua potentia sapientia et bonitate diversam hominum sortem summae trinitatis operetur abyssalis justitia oremus ergo omnes ut per preces Leopoldi veniam obtineamus et gratiam

Multum enim valet deprecatio justi assidua praesertim apud deum de concedendis certa

Burgi loco miraculose prodito reginae caeli claustrinopolis caenobium fabricavit in quo cum conthorali faecundissima resurrectionem exspectat generalem dotatus stola prima supervestiri cupiens secunda

Qua fulgebit sicut sol discurret ut scintilla subtilis et impassibilis

Gloria patri et filio et spiritui sancto

Peccatum irascendo Leopoldus non commisit dum sacrificio justitiae iniquitates non permisit

Odivit nempe iniquitatem operances scelera abominando cum dilectione proximorum

Lunam stellas et caelorum opus videns mirabatur quo sibi perfecit dei laudis materia praestabatur

Posuisti domine*

Fratres sumus Leopoldi carissimi si originem nostram deum advertimus sic nobiles si vita ab eo non degeneramus vera certaque nobilitas est et re et nomine esse christianum Christo namque servire regnare est et ejus frenis regi summa libertas

Ut alligentur reges in compedibus mandatorum ejus et nobiles ferreis teneantur manicis disciplinae

Etsi frater noster non caelibata sed fretus sit conjugio fructus tamen prole sollemnissima compensavit etiam conjugium jam factum non divortio reprobavit sed praesentia sua et matris suae utique virginum et singulari ipsum miraculo Christus dominus honoravit approbavit confirmavitque

Erant autem ambo justi ante dominum de marito et ejus uxore canit evangelium

Sorores ubicumque deo [de]dicatae plus mente quam carne virgines evax qualem exspectant commutatione cum pro perituris aeterna pro terrenis caelestia pro mundanis divina triplex denique praemium accipient pro labore immenso conspiciente Leopoldo gaudio in idipsum

Exsultabunt filiae Sion in rege Christo ipsum sequentes et carmen ei singulare canentes

Gloria patri et filio et spiritui sancto

Dolum linguae nec opprobrium contra proximos egit quia eos amore dei sicut seipsum dilexit

Ut clibanum posuit odientes Leopoldum dominus sed ei benedictionis et multorum bonorum tribuit decus

Super flumina et maria fundatus est Leopoldus quando victis tentamentis omnibus ascendit in montem domini stans in loco sancto ejus

Deo soli ex infinita sui bonitate summe se diffundenti ut in essentia simplicissima realis subsistat personarum trinitas sit laus per Jesum Christum dei et hominis filium unius quidem personae triplicis vero substantiae et duplicis naturae qui nos sanguine spiritu cooperante sancto patri reconciliavit

Impetra nobis sancte Leopolde ut Christo domino digne gratias referamus

Devoti pio et humili mentis affectu in eum qui super omnia est jugiter tendunt et a tanta repulsi majestate ipsius opera securius contemplantur infernalia timore horrentes filiali cunctis deum terrenis praeferentes varios in beatitudine admirantes caelesti qualia cogitare est vere felicitati appropinquare

Nolite fieri sicut equus et mulus ut non intellegatis gaudia sint quanta beatis

Exsultate in rege vestro o fideles animae qui ab aeterno nobis fidum praedestinavit advocatum Leopoldum inclytum qui talis est pro nobis in caelo verius qualis ab omnibus in terra est cognominatus

Pius ac piissimus meruit solotenus praedicari qui nunc ferventissimus interpellator nequit dubitari

Gloria patri et filio et spiritui sancto ob suum militem Leopoldum pium

A saeculo parata est sedes a forti domino electo Leopoldo virtutum decore praecincto

Exsultatione ast hymnorum confessione Leopoldus in conspectu intravit domini qui eum fecit hominem primo hinc justum et tandem beatificavit

Illuminavit vultum suum super Leopoldum misertus ei dominus ut mandatorum viam congnosceret et ommium gentium salutare

Omnia opera domini Leopoldi animum concitarunt ut benedicens laudaret dominum ac cunctis superextolleret ipsum

Universa quae sunt vivunt sentiunt vel intellegunt laudate nomen domini singulariter exaltatum

Laetemur nunc in domino*

Justus ut*

Fides recta indicat deum aeternum remuneratorem inquirentibus caritatis unctione seipsum requiem obtineamus mitissimam angelorum nanciscamur oblectamenta regno utamur mansuro indulgeat miseris praecamur errata remittat aversis tormentorum omnem reatum

Hymnisemus hilares aeternae sapientiae ut meritis atque rogatu illustris ethici Leopoldi auctore unigenito dei et Mariae trinitatis haereamus obsequiis moribus abjectis scelestorum consolati omnipotentis notitia rapiamus ardua deliciis usuri supernorum