Hymnizemus regi Christo qui eduxit ex Aegypto Mariam forti bracchio miretur omnis natio

Maria non parcens*

Magnificetur dominus a sanctis et fidelibus qui pulsam ab uberibus Mariam lotis pedibus duxit in solitudinem dans cordis latitudinem

Jubilemus Christo regi qui sanctorum junxit gregi Mariam Aegyptiacam per abundantem gratiam

In egressu Mariae de vitiorum barbarie facta est confessio ejus sanctificatio haec est dexterae dei mutatio

Quae vitae veteris tunica dum se spoliavit caelesti sponso thalamum nova sponsa paravit

Ista in Jerusalem filia Jerusalem et in templo domini fit templum sanctum domini

Sanctum virum Zozimam deus ad suam gloriam declarandam quae latuit mutare locum voluit

Secretum regis celare bonum est gloriam dei revelare (...)

Cumque juxta canonem claustri per solitudinem iret statuto tempore vidit angelum in corpore

Emicuit gemma David exornans diadema

Maria non parcens ori sancto pandit seniori lapsus bitae pristinae pressa pridem ac depressa peccatorum pondere post levata levigata corpus librat in aere

Suspendium enim elegit anima ejus et mortem ossa ejus

Gloria patri et filio et spiritus sancto

Posuit dominus desertum in delicias sicut veridicus praedixit Isaias dum Mariam Aegyptiam illustravit per gratiam

Non erit amplius desolata nec vocabitur ultra derelicta quae adhaesit domino corde perfecto fideque non ficta

Elongavit fugiens et mansit in cremi vastitate exspectans dominum qui salvavit eam tempestate

Benedictus pater misericordiarum qui salutem procurat animarum per quem vas contumeliae fit vas misericordiae

Benedictus deus totius consolationis qui suam famulam replevit charismatum donis

Quae conscripta pactione bona coram dei genetricis icona adorato ligno sanctae crucis dirigit pedes in viam salutis

Quam pulchri sunt gressus tui in calciamentis filia principis

Vultum lavat in Jordane confortatur Christi pane pergit bene currit tute in virtutem de virtute transit hoc edulio

Panem caeli dominus dedit ei panem angelorum manducavit homo

Gloria patri et filio et spiritus sancto

O mira dei bonitas o praedicanda pronitas ad succurrendum homini qui invocat nomen domini

Denigrata est cutis ejus super carbones ignis et non est agnitus vultus ejus in plateis

Nigra sum filiae Jerusalem et formosa facta sum dilecta dilecto ex odiosa

Tres ad victum corporales secum deportarat panes quibus in eremo vasta multis annis fuit pasta

Non enim in solo pane vivit homo sed in omni verbo quod prodit ex ore dei

Veste sua vestitate trita sancta nuditate nudum Christum sequitur die aestu nocte gelu per omne corpus uritur

Nolite me considerare quod fusca sum quia decoloravit me sol

Perceptis devotissime sacramentis Christi Maria precatur in pace jam se dimitti super fluenta Jordanis constanter graditur caelestem patriam incunctanter ingreditur

Haec requies ejus in saeculum hic habitabit quoniam elegit eam

Gloria patri et filio et spiritus sancto

Mirabilis dominus in altissimis Mariam mirabiliter exaltavit

Jubilemus domino in cordis exsultatione qui Mariam revelavit in crucis exaltatione

Apparuit domino Maria in terra deserta et invia ut videret virtutem ejus et gloriam uberem consecuta misericordiam

Benedicant dominum omnes creaturae quas finxit qui Mariam beatissimam larga manu benedixit

Laudemus dominum devotissime cum angelis qui pro Mariae paenitentia gaudent in caelis

Hymnizemus*

Benedictus deus christianorum qui conversionem vult peccatorum qui interventu matris misericordiae eduxit Mariam de lacu miseriae quam post perfectam paenitentiam ad suam suscepit praesentiam

Hymnizemus*

Vultum lavat*

Deus misericordia dives a progenie in progenies vocat Mariam misericordiam consecutam hodie transferens eam ad mansionem tutam ubi nec dolor nec gemitus ibi pro suis oret supplicibus

Decoratur virtutibus anima Mariae illustratur divinitus dono prophetiae ejus sacro corpori dum terrae commendatur bestiarum fortissimus leo famulatur