Solaris dum volvitur orbita votiva recurrunt festa in quibus et domini recitantur magnalia et Hedwigis retractantur merita

Gertrudis pietate ineffabilis tibi persolvimus debita laudis tu solita clemencia adauge devocionis incrementa

Te clangat ergo nostra notula tibi o pia reddat famulamina a te exposcat misericordiam quam nescis denegare cuiquam

Tibi rite psallimus virgo tibi laudes referimus ex debito quia quociens premimur anxietatibus ad te nobis fidus patet recursus

Mole criminum praemimur (...)

Laudem demus domino virginis inquam filio qui te o sacratissima virgo mundi resolutam ergastulo in caeli hodie relevavit palacio ubi precamur nostri memor esto

Adoremus regem Christum dominum qui hodie sanctum Udalricum perduxit ad regna caelorum

Hodiernae sollemnitatis gaudia que nobis anni reduxit orbita pia recolamus devocionae virginis Gertrudis utentes famulaminae

Generosa Christo virgo justitiae vigebat zelo sanctimoniae privilegio caelestium autem flagrabat desiderio

Hac ergo pollens maturitate morum quesivit sibi aptare virgineum sponsum cum quo virginitatis firmaret chirographum

Venerabilis virgo Gertrudis generositate quidem nobilis sanctitate autem insignis pietate laudatur et est ineffabilis

Dum adhuc tenerrima teneretur aetate morum sublimari tetendit perfectione

Virgo sacrata dum quaeriat copulari Christo quodam prepeditur offendiculo quod et viriliter vicit in domino

Austrasiorum enim ducis filius virginis inardescit amoribus

Ubi pater virginis gloriosus communis exicii complevit planctus hinc dolor nimium eius pregravavit animum quattuordecim enim tantum erat annorum

Matrem gaudebat superstitem quo ejus saltem presencia animum consolaretur puerilem

Gloria patri et filio et spiritus sancto

Sacerdotalem virum nomine amandum episcopatus quoque honore preditum ad virginis matrem direxit dominus omnium

Quem illa suscipiens gaudenter intencionem mentis ex ordine patefecit fideliter

Inde sacrum sibi mater aptavit velaminis signum placuitque regulari vinculo subiugare animum

Igitur venerabilis mater virginis hortatu amandi presulis in ecclesiam proprie domus transmutavit fastigia consecrandi gracia

Inde sacrum sibi aptavit velaminis signum

Quidam autem diabolica fraude decepti virginis inardescunt amori et quesierunt eam rapere vi et tradere nuptui

Ut autem mater defenderet virginis abusionem ejus totondit capitis cesariem

Ammonuit itaque sacratissimam mater virginem sacre subire consecracionis velamen et sic propositi servare fidem at illa continuo jubentis paruit imperio

Hortata est quoque eam addere adhuc onus oneri ut pondus regiminis imponeret sibi

Gloria patri et filio et spiritus sancto

Quadam autem die dum perseveraret virgo in oracione igneus globus mittitur e caeli regione et obnixe videtur virgini deservire

Perlustravit enim habitationem oratorii inde figitur laqueari ubi nec datur defectui nec augetur damno incendii

Mirantur ergo cuncti qui aderant et quis rei detur exitus expectant et subito vident in creacione virginis paulatim minui integritatem luminis

Timens ergo sacratissima virgo Gertrudis ne forte in arrogancie incideret jactanciam post multa virtutum exercicia pastoralis regiminis deposuit onera

Quaerens ergo Christo placere et libere per viam salutis incedere

Postquam igitur virgo sacrata regiminis expeditur sarcina castigacione maceratur voluntaria ut sine offensionis mora ad aeterna proficiscatur premia

Sciebat enim per dominicam revelationem imminere sui corporis resolutionem

Gloriosa virgo Christi Gertrudis post debita humanitatis ad regis regum arcessitur palacium ubi ob perfecte virtutis decursum immarcescibilis corone accepit bravium

Angelorum comitatu potitur atque cum digno tripudio paradisum introfertur

Gloria patri et filio et spiritus sancto

O quam generosa es virgo quae totius decoris regnas cum domino et adoptato perfrueris thalamo o pia virgo

In jubilo vocis pangamus domino cantica laudis qui te ditavit honore tanto o pia virgo alleluia

Meliorem esse domini misericordiam super vitas et orbis clamat diversitas et tua demonstrat beatitudo o pia virgo alleluia

Benedicant omnes angeli sanctique domini domino quoniam te copulavit eorum consortio o pia virgo alleluia

Laudemus nomen domini in cordis et organo quia beneplacitum est ei in te o pia virgo alleluia

Virgo Christo amabilis in omnibus laudabilis pietate autem ineffabilis tu gregis humillimi gaudium omnium quoque ad te pie clamantium exaudi nos supplices in te semper sperantes

Generosa virgo Gertrudis supplicum semper fidelissima consolatrix in te nobis portus salutis ad te clamantes exaudi rogamus et misericordiam quam de te predicamus pie senciamus

Sancta Maria intercede pro miseris ad te confugientibus apud Christum piissimum regem atque divinum ut det nobis veniam peccatorum nostrorum et gaudium sempiternam

Jesu flos matris virginis votis faveto supplicis hymnizantis tibi gregis Gertrudis festo virginis

Veneremur sollemniter auctorem pudicitiae Christum qui mirabiliter dona largitur gratiae