Paradisi de viridario rosas mittis notario quem mortis in orario celi iungis solario petimus ut a vario nos emendes anime contrario

Sancta virgo Dorothea peccatorum de morphea tua prece nos emunda et compunctionis unda penitendo nos adsperge et a cunctis periculis nos absterge

Omni laude digna cor nostrum pace Christi consigna ne nos draco stygis ledat sed pro nobis intercedat tua sancta victoria ut mundemur a peccati scoria

O Dorothea Christo grata afflictorum advocata et adiutrix sis rogata ut defectus et peccata nostra per te sint ablata

O flos amenitatis dos serenitatis rosa puritatis nos nantes in peccatis quos labis fluctat ratis adiungito beatis

Gratulare Cesarea patrone colens merita Dorothee sollempnia solis revexit orbita

Vulnerata vivaciter amoris Christi iaculo feritur hinc letaliter hec paganorum spiculo

Polorum sorti procerum consors procera redditur rosarioque martyrum flos roseus inseritur

Corpus humatum tumulo funestis caret maculis pro meritorum cumulo late miraculis

Egris salus infunditur cecis visum clarificat surdis auditus panditur Theophilum credificat

Talis athlete supplices suffulti patrociniis celigenarum complices lete fruamur gaudiis

Prestet hoc pater luminum splendorque patris inclitus ac illustrator hominum par uterque paraclitus

O castitate falerata (...)

Benedicamus Dorotheam in eius festo nam placuit regi regum altissimo celorum et domino deo dicamus grandes laudes per quem beata Dorothea triumphavit et in celi curia dat gratias

In Dorothee festo mente pura corde presto ad psallendum rite cum iubilo venite

Nomen tuum laudabile deus est et admirabile dum ex ore virgineo laudari vis in populo

Celi enarrant gloriam Christo propter victoriam Dorothee martyris laudes pangat vox celebris

Cordis puritate promissi veritate manuum innocentia summa cum sapientia castique cordis jublio placuit altissimo

Letare Cesarea civitas beata nam illustrat varia regina tua nata Dorothea que nascitur stirpe senatoria omni laude pascitur eius felix memoria

Predecora facie fulgens et venusta procuratrix gratie dulcis mitis iusta

Populus in tenebris ambulans ingentem lucem vidit radiis trinis refulgentem castitatis vadio fidei quae gumpho Dorotheam sub gladio vincentem cum triumpho

Illustrata credulus sitque natus lucis famulator sedulus Christi summi ducis

Inclinare Dorotheam preses studet idolis sororibus mittit eam novellis apostatis spondet his thesauri dare multitudinem dolens eam iugulari propter pulchritudinem

Pervertentes convertuntur crucem tollunt et sequuntur Christum pro quo moriuntur

Dilexisti justitiam odistique malitiam ideo prae tuis consortibus unxit te rex altissimus

Dicta sunt de te gloriosa Dorothea generosa in te manet benignitas tu puritatis civitas

Dum Dorothea generosa Christiana cernitur propter Christum timorosa poena mortis sternitur

Dum mense Februario rosas in orario cum frondibus notario rex fert et mala celica clamat in bivio platee fortis est dominus Dorothee en dona dat angelica

Nil territur supplicio sic loquitur Fabricio deorum tuorum numina sunt barathri demonia celos solus fecit deus qui est rex et sponsus meus

Multi credunt paganorum et relinquunt idolorum cultum dum regem celorum predicat Theophilus Christum qui persequebatur lupus in agnum mutatur Dorotheam comitatur in fide Theophilus

Hoc factum est mirabile a deo tam laudabile

Dum sub ense praestolatur mortis ictum deprecatur pro his a quibus veneratur suae necis memoria ut abundent temporalibus solvantur a mortalibus et a falsis criminalibus post haec vivant in gloria

Contristatus est prefectus regni sui scriba dum electus factus catholicus mundum timet neque deum morte dira necat eum homo diabolicus

Et livor iusti tactus caritatis odit actus

Nobilis et formosa Dorothea generosa totius fraudis inscia in Capadocie provincia imbuta fide Christiana idola spernendo vana

His vero temporibus regnat praeses Fabricius cui ducitur captiva at illa voce viva Christum confitetur poenas nil veretur

Ad tribunal vinculata virgo ducta fit sacrata quae vocetur interrogata Dorothea sum vocata Jesu Christo desponsata

Clamant omnes blasphemavit deos nostros dum negavit et se Christo desponsavit quem gens Iudea morte stravit

Quem caeli terrae maria adorant de Caesarea elegit sibi vernulam sanctissimam Dorotheam

O nobilis athleta virtutibus impleta Dorothea pia per te monstratur via incredulo et devio tuo triumpho previo

Tu candens veris primulatu florens florum rimula tu senatoris nata Dorothea grata post agnum laureata is alba cincta stola procuras ne nos mola vitiorum stringat sed pacis omen tingant