Confessor Christi Stephane gentis tue preces suscipe ut per te inveniat gratiam Christi cui contulisti lumen fidei

Ave beate rex Stephane inclita spes gentis tue ave doctor et apostole credulitatis nostre ave speculum sanctitatis et iustitie per te Christo credidimus per te in Christo salvemur ora pro populo interveni pro clero ut nullus de tui spreda fiat hostis

Regem regum venerantes adoremus dominum qui in celo coronavit sanctum regem Stephanum

Adest festum venerandum sancti regis Stephani multa laude celebrandum omni die seculi gaudeant qui sunt heredes per hunc facti domini et sanctorum coheredes meruerunt fieri

Iste sanctus predicator Hungarorum primitus Christiane legislator factus est divinitus pro binis tradens bis bina duplicato pretio vel pro quinque dans bis quina reportando domino

Mundi reges moriendo regno finem faciunt qui ut sibi celsitudo regni regno pereunt sed hic sanctus terminando terrenam potentiam sumpsit regnum inchoando sempiternam gloriam

Iam cum celos ascendisset nostra salus dominus atque suis transmisisset dona sancti spiritus repleverunt partes mundi duodeni proceres seminantes verbum dei ad salvandos homines

In omnem apostolorum terram sonus exivit et in fines orbis terre verbum horum prodiit

Gaudebat ergo patrono suo queque regio et grates pro tanto dono referebat domino restabat Pannoniorum plebs sine consilio clausa tenebris errorum in mundi naufragio

Et dum cresceret in orbe fidei religio et credentes puro corde nascerentur denuo

Genti tamen devianti per mortis illecebras et procaciter amanti cecitatis tenebras ideo differebatur salutis preconium ut post moras assequatur maius beneficium

Ore namque doctor quanto datur illi serior dono dei missus tanto venit excellentior

Gloria sit patri deo et eius filio atque spiritu sancto regnanti perpetuo

Valde felix es dicenda a cunctis Pannonia erumpe nunc letabunda in dei preconia qui tibi non preceptorem de plebe discipulum sed regem predicatorem misit et apostolum

Nam ut Attila sub rege Hungarorum populus tyrannidis lata lege seviit incredulus sic sub Stephano regnante vertitur crudelitas quo figura transmutante formatur credulitas

Dudum namque desolatam dominus Ungariam penitusque nulli datam predicantum perviam per hunc sanctum evocavit ad baptismi gratiam et cum suis hereditavit dans celorum patriam

Geyse namque duci sancto sanctus puer nascitur qui divina matris ventre gratia perfunditur et Stephano premonstrante qui post Christum passus est sed quam nasceretur ante Stephanus vocatus est

Iste deo se devovit ab adolescentia nilque lubricum cognovit ipsius infantia

Sed cum inventutis metas sanctus primum posuit atque iam virili etas in eo invaluit ex tunc factus est famosus eximiis laudibus in bellis victoriosus prudens et fortissimus

Sub mundanis armis dei miles erat strenuus nam in bonis erat ei affectus precipuus

Corde deo credens erat quod monstrabat opere omnibus sufficiebat ipse solus munere rex erat et predicator dupla dans stipendia unde corpore preceptor gauderet et anima

In divinis studiosus vir fuit operibus forma quidem speciosus magis tamen moribus

Vir beatus pardum nempe fert ad caules ovium et leonem et ad presepe bovis ferocissimum nam minis precibus et donis terret mulcet incitat pravos mites vanos bonis Christi quos deificat

Si plebs ista suscepisset alium discipulum forsitan ei misisset deus quendam alium sed rebellis gens et fortis gens grandis audacie per eiusdem virum fortis fuit danda gratie

Magnus Samson ad domandum leonem immittitur Ungaris ad predicandum rex fortis eligitur ex leonis fauce mellis favus gratus nascitur ex Ungari ore dulcis deo laus exprimitur

Inter cetera laudanda virtutis insignia patientie miranda fuit illi gratia emonstrat quod depilata pauperum protervia eius barba dum collata sunt his beneficia

Et ille tunc fuit letus dare deo gratias pro quo dignus est inventus pati contumelias

Nobilis stirpe rex sanctus sed fide nobilior caritate roboratus et spei non immemor postquam cursum consummavit presens spernens seculum Ihesu Christo commendavit gloriosum spiritum offerunt quem ad superna angelorum agmina regnaturum in eterna beatorum patria

Rege sibi pro sublato pii merent Ungari sed collega pro collato cives gaudent celici

Regia urbs alba gaude tanto digna principe decorata quidem laudere simul et nomine eo quod tam pretiosi corporis egredium possidere meruisti felix facta pretium

Gloriosa dicta sunt de te civitas domini

Scandit santus alta celi Stephanus palatia eparentis sorte primi sublatus occidua

Hinc exultat in excelso celestis militia et collega pro suscepto deo reddit cantica

O condicio miranda et felix per omnia cum a regno fit ad regna transitus perpetua cum bonis continuantur terrenis celestia

Pauperes dono iuvabat nunc pecuniario nunc hos evangelizabat salutis adloquio

Sapienter dispensare norat donum domini et mensuram erogare pro tempore tritici

O miranda potentia salvatoris in meritis beati Stephani regis et confessoris qui apud deum et homines dignus memoria cum sanctis iam tripudiat in gloria