O beata apostolorum apostola paschalis gaudii bar jola et nobis veniam postula et caeli obtine gaudia

Accessit ad pedes*

Suavissime universorum domine misericordiarum pater mitissime qui omnia sub peccato concludis ut omnium miserator miserearis miseri tuorum in omnibus miseraminum nos memores te pietatis nimiae te fontem rogamus supplices ut apud te potenti beatae Mariae Magdalenae suffulti precamine ejus te solum exemplo mereamur diligere multum ut et remittas nobis quod heu in multis tibi soli peccavimus multum

Auctorem vitae Christum laudare venite cui Maria Magdalena conregnat in aethere laeta

Ploremus coram domino cum Maria ut veniam mereamur cum illa

Ingressus Jesus domum Simonis pharisaei cum aegrotis medicus discubuit et ecce Maria mulier aegrota in domum ad medicum salutis desiderio facta impudens audacter irrupit

Quae dum lacrimosa ad eum medullitus ingemuerat a peste mox curatur qua misere languerat septem quippe nequitiis verbo medicus effugatis ignivit cor ejus incendio ardentissimae caritatis

Incendit plene Maria peccati rubigine quae arsit tam incomparabiliter per inextinguibilem sanctissimae dilectionis ignem

Intendens porro Maria unum quod est necessarium sororemque linquens solam circa frequens ministerium secus pedes domini sedebat et verbum illius semper audiebat

Jesus dum vocat Mariam per sororem nuntiam surgit illa cito et exiit ei obviam et cum venisset ubi erat ad pedes ejus plorans prociderat

Maria ergo accepit libram unguenti nardi pistici pretiosi et unxit pedes ejus et capillis suis extersit et domus impleta est ex odore unguenti

Diffusa est gratia R. In labiis*

Septem ergo Maria daemonia habuit quae universis vitiis plena fuit sed ecce quia turpitudinis suae maculas aspexit lavanda ad fontem misericordiae cucurrit convivantesque non erubuit

Quia semetipsam graviter intus erubescebat nihil quod foris verecundaretur esse credebat

Accessit*

Pulchra facie*

Specie tua*

Armilla*

Accessit ad pedes Jesu peccatrix mulier Maria et osculata est et lavit lacrimis et tersit capillis et unxit unguento

Dimissa sunt ei peccata multa quoniam dilexit multum

Caelestis medicus aegram quam sanaverat per pietatis suae sententiam confirmat fides tua inquiens te salvam fecit vade in pace

Fides etenim salvam eam fecit quae hoc quod postulabat posse se ab eo percipere non dubitavit

Gloria patri et filio et spiritui sancto

Cum esset Bethaniae Jesus venit Maria habens alabastrum unguenti nardi spicati pretiosi et fracto alabastro effudit super caput ejus

Fundans Sion in sapphiris rex Christe altissime ac propugnans jaspidibus te ex fide scientibus memor Raab et Babylonis cum Maria Magdalena confer nobis quae et illis pietatis magnalia ut ex corde paenitentes nos alienigenas his quandoque collaetari miserator perficias

Amen dico vobis ubicumque praedicatum fuerit hoc evangelium in toto mundo dicetur et quod haec fecit in memoriam ejus

Mel et lac ex*

Cujus pulchritudinem*

Ipsi soli*

Umbrosum tunc revera locum verus cervorum hinnulus cubile sibi et pascua quaesivit in meridie quando supercaelestis ille transmigrationis Idithun in corde Mariae paenitentis quod ab aestu carnalium desideriorum ex toto caelitus temperatum invenit delectabatur tam desiderabiliter requiescere

Ad ipsius quippe mentem exsultim confugerat quam post vitiorum ignes paenitentiae temperies refrigerabat

Diligebat*

Induit me dominus vestimento*

Maria plorans*

Vidit Maria duos angelos in albis sedentes unum ad caput et unum ad pedes ubi positum fuerat corpus Jesu dicunt ei illi mulier quid ploras

Dicit eis quia tulerunt dominum meum et nescio ubi posuerunt eum

Adest testis*

Maria plorans ad monumentum foris stabat et flendo se inclinans in monumentum denuo prospiciebat quamvis quidem vacuum viderat tamen iterum videre desiderabat

Non sufficiens sibi semel aspexisse vis amoris multiplicavit in ea intentionem inquisitionis

Gloria patri et filio et spiritui sancto sicut erat in principio et nunc et semper

Dixit Jesus Maria conversa illa dixit ei rabboni et dicit ei noli me tangere nondum enim ascendi ad patrem meum alleluia

Post haec conversa est retrorsum ut videret Jesum et quia amabat et adhuc de resurrectione ejus dubitabat videbat quidem sed non cognoscebat eum

Quem illi nimirum et amor ostenderat et dubietas quis esset absconderat

Maria Magdalena*

Regnum mundi*

Respondens*

Adest testis divinae misericordiae beata Maria quae lavans lacrimis maculas criminis susceptoris sui tetigit vestigia ac prava sua derelinquens itinera huic post haec assistebat verbumque illius audiebat viventi adhaerebat mortuum quaerebat viventem reperit quem mortuum quaesivit

Tantumque apud eum locum gratiae invenit ut hunc ipsis quoque apostolis verax ejus apostola resurrexisse nuntiaret

Summe propitiator Christe Jesu et susceptor peccatorum qui Mariam peccatricem commiserans liberasti rabie septenaria spirituum malignorum tu in digito dei ejiciens ex nobis vitiorum omnium daemonia consigna corda nostra propitius septiformis tui spiritus sanctimonia

Conferens nobis miserator per Mariae intercessionem veram de peccatis nostris paenitentiam et remissionem

Gloria patri et filio et spiritui sancto sicut erat in principio

Una sabbati Maria Magdalena venit mane cum adhuc tenebrae essent ad monumentum Jesu alleluia

Videns lapidem sublatum a monumento Maria cucurrit et venit ad Simonem Petrum et ad alium discipulum et dicit eis tulerunt dominum de monumento alleluia

Stans autem foris plorans inclinavit se et prospexit in monumentum Maria et vidit duos angelos in albis sedentes alleluia

Dicunt ei illi mulier quid ploras dicit eis quia tulerunt dominum meum et nescio ubi posuerunt eum alleluia

Haec cum dixisset conversa est retrorsum et vidit Jesum stantem et nesciebat quia Jesus est alleluia

Dicit ei Jesus mulier quid ploras quem quaeris dicit ei domine si tu sustulisti eum dicito mihi ubi posuisti eum et ego eum tollam alleluia alleluia

Fidelis sermo et omni acceptione dignus quia Christus Jesus venit in hunc mundum peccatores salvos facere et qui nasci dignatus est de Maria virgine tangi non dedignatus est de Maria peccatrice haec est illa Maria cui dimissa sunt peccata multa quia dilexit multum haec est enim illa Maria quae resurgentem a mortuis prima omnium videre meruit dominum nostrum Jesum Christum quem pro nostris reatibus oret quaesumus in aeternum