Extensus in eculeo vir sanctus per singula a carnificibus membra ungulis cruenter laceratur alleluia

Calens igne fidei beatus in lecto ponitur suppositisque lampadibus flammis medullitus exuritur alleluia

Magus quidam cum dei virum suum vicisse venenum perspexisset Christo credidit deumque benedixit martyrii palmam promeruit alleluia

Laudans dominum testis Christi sartaginem plumbo bullientem saltu alacer petiit in qua divinitus protectus quasi rore perfusus requievit alleluia

Martyr domini Georgius cum in eneam rotam toto dissipandus corpore fuisset impositus rota caelitus imminuta ipse integer ac sanus apparuit et benedictum dominum deum israhel gaudens in fide benedixit alleluia

Qui manet in me*

Sanctus vir Georgius martyr domini qui pro amore Christi sanguinem suum fudit beatus miles Christi gaudet in caelestibus alleluia

Domine rex aeterne qui es tuorum spes certa sanctorum per orationem servi tui Georgii memento nostri alleluia

Qui regnas cum sanctis martyr ora pro nobis ne flammis tartareis torqueamur cum impiis alleluia

Per beati Georgii meritum Christe flammas extingue criminum cui tormentorum tribuisti superare incendium alleluia alleluia

Gaudete justi*