Magnificemus dominum Christum

Hoc in templo*

Bene fundata*

Vultum Messiae studeamus laude preire cui placuit Viti puericia mente senili

Hic felix vere cito cepit fructificare arbor ut inserta prope sunt ubi sana fluenta

Adversus tantum fremuit vis terrea sanctum gracia cui Iesus meus inquid filius es tu

Ipsum quaque prece deus audit mirificatque hostia iusticie dum fiat pauset et in spe

Ex parentibus ethnicis veluti rosa de rubis tenebrosis temporibus Vitus ortus est Lucanus

Ab evo quidem electus in Christum ex utero proiectus

Factus Christo vas electum ducem nactus et angelum maturis pollet moribus ieiuniis et precibus

Ingressus sine macula et operatus iusticiam

Correptus a genitore Vitus pro religione prudenter fidem intonat gratis quam accipiebat

Infancie quippe linguam sapienciam fecit disertam

Gloria patri et filio et spiritui sancto

Astitit hic mane domini vineta putare a patre mente bona datur hinc sibi iusta corona

Nomen habens mirum levat hinc super ethera Vitum sicque per infantem dignam fecit sibi laudem

In domino fisus transmigrat in ardua Vitus qua locus est sedis et vultum cernere regis

Valeriani presidis post vexatus nequiciis manum eius restituit se persequens que languit

Non victus a malo sed vincens in bono malum

Trusus carceris in umbram lucem meruit divinam quam videns cecus fit Ylas sanat illum Vitus infans

Versus est dolor in caput eius et iniquitas in verticem illius

Post hec curam per divinam terram vectus in aliam cum nutritoribus suis multis claret miraculis

Mirabilis deus in sanctis suis

Gloria patri et filio et spiritui sancto

Hic domini montem scandit siciendo quietem unde locavit eum qua non moveatur in evum

Quem prevenisti dulcis benedictio Christi iam Vito vitam tribuisti sepe petitam

Innocius manibus mundo quoque pectore mundus te rex virtutum peciit per prelia morum

Imperatoris filius a demonio captivus per sanctum puerum sensum recepit pristinum

Magnificavit illum deus in conspectu regum et in verbis suis monstra placavit

Per se Christus visitabat per secarcer quos artabat quibus et cadunt vincula vox concinit angelica

Benedictus dominus deus Israhel quia visitavit et fecit redempcionem plebis sue

Proponebatur bestiis Vitus martyr cum sociis sed leo mitis trepidat mens humana quos laniat

Obturaverunt os leonis extinxerunt impetum ignis

Gloria patri et filio et spiritui sancto

Extensum pena que carperet ossa tenella Vitum cum sociis dat tutum cura tonantis

Incumbit precibus dum tendit ad ethera Vitus ad quem vox Christi sit sint rata queque petisti

Quas efflant animas Vitus sociique beatas Christe locas celis glebas Florencia glebis

O benedicte deus cunctis benedicere rebus premia qui Vito reddis gratis benedicto

Celorum dominum collaudet quidquid creatum et Viti meritis iam spiritus ymnisat omnis

Hodie candida stola mire purpura decora victoriose palmatus dignissime laureatus deo dignus puer Vitus claris meritis fulgidus agni fit comes vinei per lilia paradysi qua memor sui memorum sit per secula seculorum

De patrono gratulemur et presentem veneremur ipso intercedente placare Ihesu Christe ut in hac vita veniam consequamur et graciam

Recordare quoniam caro sumus spiritus vadens et non regrediens

Gloria patri et filio et spiritui sancto

Sancte Vite tuos famulos pio precatu ab omni culpa emunda commenda deo celestium ut consortes facias gaudiorum

Alme puer Vite qui vere gaudia Vite iam possedisti miserere piissime nostri