Doctor egregie*

O gloriosum lumen omnium ecclesiarum sole splendidius o vere apostolicum sidus altissimum sancte Paule qui eterni solis splendorem tenebris gencium infudisti qui in terra positus celorum secreta petisti et que non licet homini loqui pervidisti illuc supplices tuos post huius carnis terminum perducere dignare quos fecisti veritatis lumen agnoscere

Accepta potestate ibat per viam fremens et frendens et crudeliter servens capere cupiens quos vellet qua captus est sit laus et honor deo

Venit vox de celo cum luce super eum dicens illi Saule Saule quid me persequeris durum est tibi contra stimulum calcitrare

Ad manus autem trahentes illum duxerunt Damascum et erat ibi tribus diebus non videns et non manducavit neque bibit

Respondens autem Ananias dixit domine auditum est a multis quod vir iste multa servis tuis mala ingerit et nunc habet potestatem alligare omnes qui invocant tuum nomen

Vade ait dominus quoniam vas eleccionis est michi iste ut portet nomen meum coram gentibus et regibus et filiis Israhel et ego ostendam illi quanta oportet eum pati pro nomine meo

Saulus autem tremens ac stupens dixit ad eum domine quid me vis facere ait autem dominus ad eum surge et ingredere civitatem et dicetur tibi quid te oporteat facere

Saule frater dominus misit me ad te qui apparuit tibi in via qua veniebas ut videas et implearis spiritu sancto

Ingressus Paulus in synagogam predicabat Iudeis dominum affirmans quia hic est Christus

Cum autem complacuit ei qui me segregavit ex utero matris mee et vocavit per graciam suam ut revelaret in me filium suum in gentibus continuo non acquievi carni et sanguini sed abii ad antecessores meos apostolos