Dies adest celebris ad lucem de tenebris consurge Polonia preciosi martiris glebam fonens corporis letare Cracovia Stanislay presulis preclara miraculis auge natalicia alleluia

Ortus de Polonia Stanislaus studia legit puerilia studiosa mente tandem Christi vernula sublimatus infula fit virtutum formula domino favente alleluia

Grandescit fitque minimus inter maiores maximus dignitate sublimior sanctitate prestancior presul dei Stanislaus alleluia

Corpus domans ieiuniis frangit panem pauperibus ecclesie negociis astat diurnis actibus nocte vacans vigiliis instat divinis laudibus alleluia

Imitator redemptoris querens dragmam decimam more boni mercatoris margaritam optimam Stanislaus vir amoris corpus penis dans tortoris lucrifacit animam alleluia

Gaude mater Polonia prole fecunda nobili summi regis magnalia laude frequenta vigili

Cuius benigna gratia Stanislay pontificis passionis insignia signis fulgent mirificis

Hic certans pro iustitia regis non cedit furie stat pro plebis iniuria Christi miles in acie

Tyranni truculentiam qui dum constanter arguit martyrii victoriam membratim cesus meruit

Ora pro nobis beate Stanislae

O beate Stanislae presul plebis Cracovie cuius signa victorie late patent Polonie nam dono Christi gracie pestes curantur varie tua martyr egregie festa colentes hodie regi commenda glorie alleluia

Stanislay pro triumpho Christo demus gloriam qui martyri de tyranno contulit victoriam alleluia

Stanislaus vir beatus legem dei meditatus Boleslao scelerato restitit et in via peccatorum non stetit alleluia

Dum prophanum Boleslaum Stanislaus arguit et mucrone spiritali feriendum censuit rex inpius contra pium cum suis infremuit alleluia

Stanislai dominus caput exaltavit vocem eius sanguinis ultor exaudivit peccatorum fremitum et dentes contrivit alleluia

Celebret Polonia festina solempnia veneretur inclita passionis merita sancti Stanislay alleluya

Quem occidit impia dei pro iusticia manus Boleslay

Affluens deliciis largus beneficiis belliger in hostibus tyrannus militibus hic fuit Boleslaus alleluia

Cuius in temporibus plebem dei legibus regebat Stanislaus

Assumptus ex hominibus presul pollet virtutibus sanctus Stanislaus rex profusus sceleribus et in fontum cruoribus sordet Boleslaus alleluia

Quem pro suis actibus castigat crudelibus pater Stanislaus

Sanctum suum dominus iam mirificavit cuius in certamine mentem dilatavit quia deo victimam se sacrificavit alleluia

Deus virum sanguinum penitus despexit in via iusticie Stanislaus rexit dans palmam victorie iusto benedixit alleluia

O domine nomen tuum magnum et mirabile leve iugum passionis facit et amabile pro quo sanctus martyrium protulit laudabile alleluia

Videns regem depravatum gregem suum prede datum iusque chori prophanatum spiritali sceleratum presul ferit gladio alleluya

Patricide mox futuro deum factus negaturo negatur communio

Ad seva regis opera nature stupent federa lactat canem puerpera canis pendens ad ubera materna torquet viscera alleluia

Res inaudita seculis dat lac humanum catulis abiecta prole tenera

Are dei dum astaret et divina celebraret Stanislaus pontifex vigiilandum lacerandum Boleslaus mittit manus truculentus carnifex

Ter procedit ter recedit ter invadit terque cadit missus necis artifex

Gloria patri et filio et spiritui sancto alleluia

Confisus in domino martir Stanislaus hostem vincit moriens vir victoriosus et ad montem domini migrat gloriosus alleluia

Intrat habitaculum dei tabernaculum sanctus sine macula per mortis articulum carnis rumpit vinculum victurus in secula quo lux lucet sedula alleluia

Deus tuo munere iustum prevenisti cordis desiderium illius implesti cum corona glorie vitam tribuisti alleluia

Membra sparsim laniata rose rubent sanguine aquilisque deputata celesti munimine nocte die sunt servata circum fuso lumine alleluya

Sepulture commendata sana salva restaurata dei medicamine

Sanctus iste pro te Criste rege spreto datur leto vir insignis digne signis fulget Stanislaus alleluia

Martir cesus gaudet lesus stat invictus rex devictus gemit Boleslaus

Gloria patri et filio et spiritui sancto alleluia

Pastor cadit in gregis medio dormit sponsus in sponse gremio mater plorans gaudet in filio quia vivit victor sub gladio alleluia

Cleri plebisque concio in patris natalicio iubilet cum tripudio pro tanto beneficio

Gloria patri et filio et spiritui sancto alleluia

Ora pro nobis beate Stanislae

Stanislaus in agmine martyrum vernans sanguine munit scuto passionis castra veri Salomonis coronatus martyrio regnat in celi solio alleluia

Deconcive celum gaude de patrono terra plaude Stanislaus dignus laude cum sanctis letatur angelis equatur alleluia

Novis signis dominus sanctum decoravit dum custodes aquilas sibi deputavit et in nocte corporis partes illustravit alleluia

Ad festa patris inclita populi concurrunt per cuius clara merita mortui resurgunt ceci claudi morbidi egri sani surgunt et ad Christi gloriam laudibus assurgunt alleluia

Veri solis radius medicus celestis meritorum martiris auctor est et testis in splendore corporis castitatem signans quod integrum reddidit amorem designans alleluia

Martyr dei Stanislaus gloriosus pontifex quem occidit Boleslaus truculentus carnifex pastor bonus et patronus assit nobis opifex sit virtutum artifex alleluia

Vir inclite Stanislae vita signis passione plebem tuam pater bone fove benediccione guberna proteccione salva sancta intercessione alleluia

Te flagitamus vocibus Stanislae supplicibus optine pastor ovibus tuis beatis precibus ut exuti reatibus et malis imminentibus celi iungamur civibus alleluia