Praecelsi confessoris Christi tam meritis quam nomine Magni natalis assunt nobis festa diei qua deposita gravi carnis hujus sarcina aeterna laboris sui gaudens adeptus est praemia unde nunc ejus unanimes laudibus insistamus ut et nos tanti apud deum patroni perpetim suffragia sentiamus

Maximum regem cunctorum adoremus dominum qui beatum Magnum hodie sanctorum conjunxit gloriae confessorum

Sanctus vir Magnoaldus Scotigenae stirpis ex Hibernia insula fuit oriundus

Hic divino instinctus amore mundi coepit nugas cedere et Christi gymnasia Tyronum mente devota crebrius visitare

Ubi per vere lucis praeconem beatum Gallum excitatus somno saecularis vitae rejecto monastice ergasterium regulae strenuus est operator ingressus

Felicissimum beati Magni specialis patroni nostri recolentes transitum unanimiter omnes glorificemus dominum

Qui ab occiduis finibus mundi talem nobis fecit solem oriri

Beatus Magnus cum sancto Gallo plurimus in hac regione virtutibus decoratus a Joanne episcopo Constantiensi in diaconatus est gradum promotus

Sicut ipsi discedens sanctus praedixerat Columbanus

Post sancti patris obitum Columbani beatus Magnus ad ejus coenobium missus epistolam absolutionis et baculum ejus felici retulit Gallo

Ut interdictum per haec sibi cognosceret officium esse permissum

Sub sancto itaque patre degens Columbano omni morum sanctitate summis in brevi coaequatus est viris

Cumque virtute praepollens obedientiae curam administraret cellarii antiquo maris rubri miraculo caelitus meruit decorari

Nam ipsius ad vocem cum minister currens properaret liquor quem edulio profluentem oblitus reliquit supra vas quod influebat mirum in modum solidatus cumulum effecit

Triennio post beati Galli sepulturam evoluto sanctus Magnus cum Theodoro divina revelatione roboratus ad partes orientes profectus est

Duce itineris Tozzone presbytero sibi divinitus misso

Veniens vir dei Brigantium caeco cuidam stipem petenti diu negatum restituit visum

Orationem domino fundens et oculos ejus sputo suo liniens

Cum Campidonam sanctus venisset et plenum serpentibus oppidum invenisset pridem hominibus inhabitabilem divino servitio locum reddidit habilem

Ingentem ibi boam in nomine domini bacillo neci sternens reliquosque angues in fugam vertens

Jussione viri dei ursus poma discrevit et optima quaeque in usus servorum dei intacta servavit

Ad preces ejus plurima convolans copia volucrum sanctis se viris ultroneum praebuit esum

O vere mundum et purum beati Magni interiorem oculum quo corporaliter absentia in spiritu meruit conspicere praesentiam

Miris magnorum radiis fulgens meritorum pro nobis miseris sanctissime Magne preceris

Ostendendo bonum te clementemque patronum

Expulsis e Campidona daemonibus relictoque inibi ad Christi famulatum Theodoro vir beatus ad Wicterpum Augustae praesulem venit ejusque permisso et auxilio Fauces Alpium petiit

Cum prius horribilem Christi virtute draconem peremisset

Vir deo amabilis amator solitudinis electum sibi excolens locum oratoria et cellas construxit atque tetras daemonum inde phalanges propulsavit

Jejuniis vacans orationibus invigilans

Confessor domini sanctissime meritis et nomine Magne supplicum vota tuorum pie quaesumus suscipe qui in his quondam terris advena et peregrinus nunc civis santorum et domesticis dei perpetim gaudens in caelestibus

Nos quoque exsules regni captivos saeculi patriae reddas paradisi

Comperta virtutum beati Magni fama Pipinus princeps locum quem sanctus incoluit regia largitione donavit

Cum ad pontificem Wicterpum venisset vir dei idem cum Theodoro episcopus caput ejus caelesti vidit lumine coronari

Accito ad Campidonam sanctus Magnus episcopo oratorium quod Theodorus inibi construxit se praesente dedicari impetravit

Deo dignus diaconus Wicterpi praesulis petitione coactus sacerdotalem dignissime ab eo percepit benedictionem

Divina donante clementia vir domini urso monstrante et obsequelam ad nutum ejus praebente venas ferri ad usum posteritatis meruit invenire

Post transacta trium et septuaginta annorum curricula beatus Magnus meritis aetate et sanctitate plenus ex hujus incolatu vitae mortalis Christo vocante ad aeterna transivit gaudia patriae caelestis alleluia alleluia

In visione raptus divina ipsa qua commissa est hora regum longa regione semotam vidit mirifice pugnam

Beatus Magnus in hac terra cum sancto Columbano peregrinatus juxta Brigantini mansit aliquamdiu confinia Latiis

Cum Italiam petiturus sanctus discederet Columbanus infebricitantis Galli solatium de futuris prius instructum reliquit in his finibus Magnum

O felicem et salutiferam febrem quae beatum Gallum atque sanctissimum Magnum duos tam mirificos animarum medicos ad salutem languentis Sueviae fecit in hac patria remanere

Inter varias mundi tentationes fluctantibus servulis tuis ad te sanctissime Magne missae nobis a deo patrone tutum semper portum salutis confugium praebe