Franciscus vir catholicus et totus apostolicus ecclesiae teneri fidem Romanae docuit presbyterosque monuit prae cunctis revereri

Coepit sub Innocentio cursumque sub Honorio perfecit gloriosum succedens his Gregorius magnificavit amplius miraculis famosum

Hunc sanctus praeelegerat in patrem quando praeerat ecclesiae minori hunc spiritu prophetico provisum apostolico praedixerat honori

Franciscus evangelicum vel apicem vel unicum transgreditur nec jota nil jugo Christi suavius huic onere nil levius in hujus vitae rota

Hic creaturis imperat qui nutui subjecerat se totum creatoris quidquid in rebus reperit delectamenti regerit in gloriam factoris

Salve sancte pater*

Euntes inquit in eum qui nutriet vos dominum jactate cogitatum sic fratribus erroneum praecludit et interminum callem cupiditatum

Sit curis cor extraneum non praevidet in crastinum in zonis aes ligatum

Gloria patri et filio et spiritui sancto

Proles de caelo prodiit novis utens prodigiis caelum caecis aperuit siccis mare vestigiis

Spoliatis Aegyptiis transit dives sed pauperis nec rem nec nomen prodidit factus felix pro miseris

Assumptus cum apostolis in montem novi luminis in paupertatis praediis Christo Franciscus intulit

Fac tria tabernacula votum secutus Simonis quem hujus non deseruit numen vel omen hominis

Legi prophetae gratiae gratum gerens obsequium trinitatis officium festo sollemni celebrat

Cum reparat virtutibus hospes triplex hospitium et beatarum mentium cum templum Christo consecrat

Domum portam et tumulum pater Francisce visita et Evae prolem miseram a somno mortis excita

Patri nato paraclito decus honor et gloria sint hujus sancti merita nobis aeterna gaudia amen

Ora pro nobis beate Francisce R. Ut digni efficiamur*

O stupor et gaudium o judex homo mentium tu nostrae militiae currus et auriga ignea praesentibus transfiguratum fratribus in solari specie vexit te quadriga in te signis radians in te ventura nuntians requievit spiritus duplex prophetarum tuis adesta posteris pater Francisce miseris nam increscunt gemitus ovium tuarum

Regi qui fecit opera Christo confiteantur cujus in sancto vulnera Francisco renovantur

In caelesti collegio novus collega colitur in sanctorum rosario novellus flos producitur

Franciscus florens gratia forma factus humilium laetus potitur gloria sortis consors humilium

Metit de sparso semine plenae messis manipulum fallens sub terrae tegmine nostrae salutis aemulum

Hic carnis supercilium legi subjecit spiritu mundum vicit et vitium se victo victor inclytus

Linguae manus praeambula verbo paravit semitam et amplectuntur saecula doctrinam facto proditam

In paupertatis praedio minorum plantans vineam ostendit magisterio vitae vivendi lineam

Ad aeternas divitias turbas allexit pauperum quos ad caeli delicias lingua vocavit operum

Vita doctrina splenduit resplendet et miraculis sic praefuit quod profuit via lucerna populis

Summi regis palatio doctor lota discipulos saluti privilegio Christi praemuni famulos

De tenebris miseriae sequaces stellae praeviae quaeramus patrem gratiae consortes tandem gloriae amen

Hic vir in vanitatibus nutritus indecenter divinis charismatibus praeventus est clementer

Excelsi dexterae gratia mirifice mutatus dat lapsis spem de venia cum Christo jam beatus

Mansuescit sed non penitus inprimis per languores qui captis armis caelitus ad plenum mutat mores

Amavit eum dominus R. Et ornavit eum

Franciscus ut in publicum cessat negotiari in agrum mox dominicum secessit meditari inventum evangelicum thesaurum vult mercari

Deum quid agat unicum consultans audit caelicum insigne sibi dari

In dei fervens opere statim ut sua vendit pauperibus impendere pecuniam intendit quae gravi suo pondere cor liberum offendit

Quam formidante paupere presbytero recipere abjectum vilipendit

Dum pater hunc persequitur laetens dat locum irae constanter post aggreditur in publicum produc squalenti vultu cernitur putatur insanire

Luto saxis impetitur sed patiens vir nititur ut surdus pertransire

Gloria patri et filio et spiritui sancto

Pertractum domi verberat praecunctis furens pater objurgans vincit carcerat quem furtim solvit mater

Jam liber patris furiae non cedit effrenati clamans se voluntarie pro Christo mala pati

Ductus ad loci praesulem sua patri resignat nudusque manens exsulem in mundo se designat

Os justi meditabitur sapientiam R. Et lingua ejus loquetur judicium

Dum seminudo corpore laudes decantat Gallice zelator novae legis latronibus in nemore respondit sic prophetice praeco sum magni regis

Audit in nivis frigore projectus jace rustice futurus pastor gregis

Amicum quaerit pristinum qui spretum in caenobio contexit contemptu gaudens hominum leprosis fit obsequio quos antea despexit

Sub typo trium ordinum tres nutu dei praevio ecclesias erexit

Audit in evangelio quae suis Christus loquitur ad praedicandum missis hoc inquit est quod cupio laetanter his innititur memoriae commissis

Non utens virga calceo nec pera fune cingitur duplicibus dimissis

Gloria patri et filio et spiritui sancto

Cor verbis novae gratiae sollicitus apponit verbumque poenitentiae simpliciter proponit

Pacem salutem nuntiat in spiritus virtute veraeque paci sociat longinquos a salute

Ut novis sanctis merita remunerentur natis his nova tradit monita viam simplicitatis

Lex dei ejus in corde ipsius R. Et non supplantabuntur gressus ejus

De paupertatis horreo sanctus Franciscus satiat turbam Christi famelicam in via ne deficiat iter pandit ad gloriam et vite vitam ampliat

Pro paupertatis copia regnat dives in patria reges sibi subiciens quos hic ditat inopia

Sex fratrum pater septimus absorptus luce caelitus futura contemplatur inter minores minimus quis parvi gregis exitus praeclare speculatur

Quadrans quoque novissimus culparum sibi penitus dimitti revelatur

Arcana suis reserans octavum tandem recipit et ad diversas gentes binos mittendos foederans humiliari praecipit et esse patientes

Grex procidit obtemperans pastor erectos suscipit ad oscula gaudentes

Gloria patri et filio et spiritui sancto

Sanctus Franciscus praeviis orationum studiis quid faciat instructus non sibi soli vivere sed aliis proficere vult dei zelo ductus

Hinc praedicando circuit et quem non homo docuit fit doctus in stuporem virtutum verba loquitur novumque nova sequitur militia ductorem

Tres ordines hic ordinat primumque fratrum nominat minorum pauperumque fit dominarum medius sed poenitentum tertius sexumque capit utrumque

Doctus doctrinae gratia doctus experientia quae sunt perfectionis haec fratres docet omnia tam factis quam frequentia melliflui sermonis

Laudans laudare monuit laus illi semper adfuit laus inquam salvatoris invitat aves bestias et creaturas alias ad laudem conditoris

Plange turba paupercula patre ditata paupere laudes propina pocula sacro depressa ubere

Hic simplex rectus humilis pacis cultor amabilis lumen in vase fictili ardens lucens in fragili

Vili contentus tegmine sancto calescens flamine vicit ardorem caumata Christi dum gestat stigmata

Carnem mundumque conterens hostes malignos proterens auream victor meruit aureolam dum docuit

Pauper nudus egreditur caelum dives ingreditur spargit virtutum munera aegris profligat vulnera

Verorum pater pauperum nos pauperes fac spiritu consortes redde superum erectos ab interitu

Patri nato paraclito decus honor et gloria sint hujus sancti merita nobis aeterna gaudia amen

Ora pro nobis beate Francisce R. Ut digni*

O martyr desiderio Francisce quanto studio compatiens hunc sequeris quem passum libro reperis quem aperuisti tu contuens in acre seraph in cruce positum ex tunc in palmis latere et pedibus effigiem fers plagarum Christi tu gregi tuo provide qui post felicem transitum dirae prius et lividae glorificatae speciem carnis praetendisti

Sanctus Franciscus praeviis*

Salve sancte pater patriae lux forma minorum virtutis speculum recti via regula morum carnis ab exsilio duc nos ad regna polorum

Sancte Francisce pater accelera ad populum qui premitur et teritur sub onere palea luto latere et sepulto Aegyptio sub zabulo nos libera carnis exstincto vitio

Caelorum candor splenduit novum sidus emicuit sacer Franciscus claruit cui seraph apparuit signans eum caractere in volis plantis latere dum formam crucis gerere vult corde ore opere

Carnis spicam contemptus area Franciscus frangens terens terrea granum purum excussa palea summi regis intrat in horrea

Vivo pani morte junctus vita vivit vita functus

Gloria patri et filio et spiritui sancto

Decus morum dux minorum Franciscus tenens bravium in te vitae datur vitae Christe redemptor omnium

Plaudat frater regnat pater concivis caeli civibus cedat caecus psallat coetus exsultet caelum laudibus

Demptum solo datum polo signorum probant opera ergo vivit nam adivit aeterna Christi munera

Pro terrenis votis plenis reportat dona gloriae quae decoras quem honoras summae deus clementiae

Hunc sequantur huic jungantur qui ex Aegypto exeunt in quo duce clara luce vexilla regis prodeunt

Regis signum duce dignum insignit manu latere lux accedit nox recedit jam lucis orto sidere

Est dux fidus clarum sidus ducit relucet devia devitando demonstrando beata nobis gaudia

Mina gregem dux ad regem collisor hostis callidi nos conducas et inducas ad cenam agni providi amen

Ora pro nobis beate Francisce*

O virum mirabilem in signis et prodigiis languores cum daemoniis quoslibet pellentem dat aurem suis avium praedicans silvestrium verbis intendentem o vita laudabilem qua fidem sic magnificat sed et multos vivificat mortuos defunctus Francisce nos caelestium fac consortes civium quibus es conjunctus

Alleluia Iste est qui ante deum magnas virtutes operatus est et omnis terra doctrina ejus repleta est

Alleluia O patriarcha pauperum Francisce tuis precibus auge tuorum munerum in caritate Christi quos cancellatis manibus te cutiens ut moriens Jacob benedixisti

Laetabundus Francisco decantet clerus alleluia | Quem confixit novis clavis amor verus res miranda | Mens in carne latuit novo modo splenduit sol de stella | Vir qui sic refloruit aves voce monuit semper clara | Sicut Christe docuit paupertatem tenuit pari forma | Hic prolem quam genuit possidere noluit haec corrupta | Jam in caelis jubilat signis novis rutilat valle nostra | Renovantur oculi lingua crevit parvuli carne sumpta | Os mutorum solvitur bivis vita redditur haeresis convincitur esse caeca | Lepra cedit saliunt claudi febres fugiunt multa regna sentiunt haec praedicta | Soldani prospera sprevit et aspera sed hunc non laesit gens misera | Ostendunt vulnera novaque muna dat quem genuit puerpera alleluia