Beatus vir qui suffert*

Justus cor suum*

Stolam jucunditatis*

Hic vir despiciens*

Sanctus confessor*

Descendit dominus cum sancto Othmaro in foveam et in vinculis non dereliquit illum donec afferet illi sceptrum regni et potentiam adversus eos qui eum deprimebant mendaces ostendens qui maculaverunt illum

Regi regum summo jubilemus domino qui hodie suum dilectum glorificavit Othmarum

Igitur Othmarus abba natione Suevorum oriundus fuit

Hic in aetate juvenili in Raetiam ductus est ibique litterarum scientia eruditus est

Qui per gradus probitate morum conscendens sacerdotii dignitate sublimatus est

Vir dei in palatio victoris ducis militans ecclesiam sancti Florini ab eo suscepit regendam

Sanctus dei cultor in dies virtutum magnitudine longe lateque clarescens exteras etiam regiones sanctitatis suae odore aspersit

Unde vir quidam nobilis de Suevis viro dei missionem remeandi ad patriam a duce impetravit

Sanctus confessor dei Othmarus jam adhuc aetate puerulus toto affectu mentis hausit potum sapientiae salutaris

Saluti hominum caelitus destinatus et exemplo aliis mox futurus

Hic ut in virile robur evasit sacerdotii gradum conscendit et quidam titulo praelatus odore virtutum suarum sparsim est divulgatus

Omni laudabilis vitae merito se ipsum inreprehensibilem exhibendo

Vir dei Othmarus cellae beati Galli in patrem promotus erga sibi injunctum officium sollicitus gessit pii mandrite studium

Vere fidelis et prudens servus supra familiam domini constitutus

Quoddam tempore sanctus pater ad regem Pipinum profectus regiis muneribus recessit ab eo donatus sed pene quidquid ibi percepit pro foribus palatii pauperum turbis distribuit

Paternis visceribus inopiae miserorum compassus pecuniam quamvis sibi tunc necessariam

Iste vir sanctum dei famulum gloriosissimi regis Pippini secum deferens devote aspectibus praesentavit

Rex vero benivolus gratanter eum suscipiens impetrantibus sancti Galli monachis abbatem eis constituit et thesauris atque praediis magnifice donatum dato ei privilegio honorifice dimisit

Sanctus ergo pater domum veniens officinas regulari vitae congruas strenue construxit atque congregata inibi multitudine monachorum copiosa caenobium cum caenobiotis amplissime adauxit insuper praedia multa loci incolis acquisivit

Erat namque Othmarus hospitalis valde cunctis affabilis pater pauperum papas egenorum jejuniis atque vigiliis seipsum semper acerrime afflixit Othmarus quippe in omni fuit virtute conspicuus et laudabilis

Quanto in caelis anima beati Othmari cum domino vel quali perfruatur honore ad sepulcrum ejus virtutes signorum frequentissime liquido declarant alleluia

Sancte deo dilecte confessor Christi Othmare peculiare nos tuum ovile et omnem hanc plebem tuis precibus assiduis domino semper commenda sancte et gloriose miles Christi cum deo et sanctis omnibus pro tuis felicibus meritis in regno caelesti in aeternum gaudebis

Igitur pater venerandus quorumdam principum iniqua potentia oppressus illis in quantum sibi licuit zelo Christi armatus restitit

Nam lupis ovile domini vastantibus et res ecclesiasticas diripere cupientibus

Judices vero iniqui tecnis callidi hostis instructi infamiam viro dei per quendam falsiloquum inpingebant quem suae nequiciae fautorem aptum asciverat

Sed nimiis doloribus dignis quae sibi cruciatibus ultio divina illum mox est prosecuta

Beatus confessor Christi Othmarus sine causa damnatus ad palatium Potami ductus est ibique diu laboribus probatus perfectus inventus est

Jussu tyrannorum carcere clausus et fame usque ad mortem afflictus

Cum autem creator agonum certamine militem suum vellet quiescere de ergastulo corporis eductum ad gaudia regni caelestis est translatus

Dilectus deo et hominibus cujus memoria in benedictione est

Mendaces ostendit dominus qui maculaverunt beatum Othmarum et dedit illi claritatem aeternam alleluia alleluia

Preciosissimo corporis almi patris thesauro in ecclesia beati confessoris Galli recondita ejus sanctissima merita claruerunt per multa miracula

Ut tantae claritas lucernae in domo domini omnibus luceret longe lateque innotuit

Quidam vero detecto basilicae viri dei supra sepulcrum ejus corruit qui mox sanus surrexit et inceptum opus laetus peregit

Non sine ammiratione cunctorum astantium revertens gratias egit deo ac beato Othmaro

Sanctimonialis quaedam utrisque orbata luminibus sancti confessoris ecclesiam adiit ibique visum quem amiserat recepit

Auditis de eo tantis virtutibus ad tumbam ejus oratura prosternitur

Inclyte confessor fratrumque fidelis amator instanter precibus nostros relevato reatus namque tuis meritis speramus dona salutis

Virtutum radiis qui clarus in orbe nitescis ora pro famulis o pater alme tuis

Beatus Othmarus abba a tyrannis Warino et Ruthardo in insulam Rheni relegatus in confessione Christi migravit

Sepultus ergo decem annos ibidem requievit incorruptus

Post decem vero annos visum est discipulis ejus ut ad monasterium sancti Galli eum deferre deberent

Cumque navi sanctum corpus imposuissent tempestas quae toto saevivit pelago nulli eis fuit impedimento

Fratribus autem ad refectionem considentibus vasculum saepius exhaustum liquoris detrimenta non sensit

Beati ergo corpus Othmari in ecclesia sancti Galli positum multis inibi miraculis caelitus est clarificatum

Quanto in caelis*

Quidam vero adolescens membris omnibus miserabiliter contractus dum cuidam caeco mente benigna ductoris officium exhibuisset utili errore in sarcophagum viri sancti impegit et mox diu denegatam recipere meruit sanitatem

Surdus quidam et mutus viri sancti tumbam aggressus altari pro dono tabellas imposuit hic divinitus sopitus desiderata sanitatis gaudia suscepit

O antiquis miraculis conferendum quod remissis fratribus contigit inter prandendum nam liquor parvae potionis per incrementa crescebat donec illos omnes convivas satietate vicisset

Cum autem creator*

Beatus Othmarus athleta dei electus bonum certamen certavit cursum consummavit fidem servavit quapropter in vinculis non dereliquit eum dominus donec afferret illi sceptrum regni et potentiam adversus eos qui eum deprimebant