O Margarita caelorum virgo secreta jam conscendisti suavissima victima Christi ora pro nobis virtus quo crescat amoris

Magnificemus dominum salvatorem omnium in spiritu exsultantes et festum celebrantes beatae Margaritae ancillae humilis suae nos ut ejusdem precibus criminum expurgemur faecibus

Auctorem vitae Christum laudare venite cui Margarita conregnat in aethere laeta

Haec virgo praedicans nomen tuum Jesu bone a te meruit coronari gloria et honore

Testimonium domini fidele sapientiam praestitit parvulae hostis ideo saevissimus non dominatus est ejus

Innocentiam retinens mundumque cor diligens per poenas temporales portas introivit aeternales

Diffusa est gratia*

Felix igitur Margarita sacrilego sanguine progenita fidem quam spiritu sancto percepit vitiorum maculis nimis infecit

Ibat de virtute in virtutem ardenter sitiens animo salutem

Haec modica quidem in malitia sed mire vigens pudicitia praeventa gratia redemptoris oviculas pascebat nutricis

Simplex fuit ut columba quemadmodum serpens astuta

Quadam die Olybrius molestus deo et hominibus dum transiens visum in illam sparsit mox in concupiscentiam ejus exarsit

Erat enim nimium formosa in vultu scilicet floruit ut rosa

Gloria patri et filio et spiritui sancto

Desiderans speciem ejus benedixit eam deus trahens illam ad se in laetitia et exsultatione

Virtutum dominus susceptor illius arcum potentis confregit qui carnaliter eam occidit

In medio templi regis sempiternam misericordiam suscepit qua jugiter gaudebit

Misit protinus clientes ad inquirendos ejus parentes ut si libera probaretur in conjugium sibi copularetur

Sed hanc qui desponsaverat non ita praeordinaverat

Dum tyrannus intellexit quod eum virgo despexit jussit eandem iratus suis praesentari tribunalibus

Hanc sperans puellarum more minis vinci subjuncto terrore

Virgo veneranda in magna stans constantia verba contempsit judicis nil cogitans de rebus lubricis

Caelestis praemii spe gaudens in tribulatione erat patiens

Gloria patri et filio et spiritui sancto

Dicta sunt gloriosa de te virgo speciosa sis memor hinc nostri devotos quos tibi nosti

In populis annuntiemus mirabilia quae fecit deus hac in beata martyre quia vixit absque crimine

Tubis in ductilibus psallat omnis spiritus judicaturo cuncta saecula in quo jam exsultat haec agni pedissequa

Post carceris squalorem carnisque macerationem Christi virgo tenebrosis denuo recluditur in locis

Nomen domini laudare non desinens et glorificare

Sancta martyre precatibus instante draco foetore plenus apparuit qui hanc invadens totam absorbuit

Quem per medium signo crucis discidit et de utero ejus illaesa exivit

Fortis agonista secum meditatur ut ista astitit exorat daemon sua crimina prodat cogitur afflictus discedit denique victus

Fratrem truncatum dolet ac sese superatum

Gloria patri et filio et spiritui sancto

Martyr insignis Margarita juxta praefecti decreta de viis carceri subtrahitur suisque conspectibus assistitur

Cumque nullis blanditiis ad consensum molliretur judicis furore nimio inflammatus jussit eam accendi lampadibus

Ministri statim tenellae corpus comburebant puellae sed haec oratione facta igne permansit intacta

Vas immensum aqua plenum praeses imperavit afferri et in illud virginem ligatam immergi

Laudabilis dominus in suis virtutibus vincula manuum relaxavit suamque famulam de morte liberavit

Videntes haec mirabilia baptizati sunt quinque milia quos capite plecti censuit ira praefecti quibus addicta Christi testis invicta benedicens deum deorum in saecula saeculorum

Sanctum nomen domini magnificent omnes populi qui Margaritae sanctae petitionibus ultimis instante promisit se daturum vitae praemia ejus digne recolentibus sollemnia quorum nos consortes in dilectione fortes faciat ad suam laudem per infinita saecula amen