Inclyta sanctae virginis Catharinae sollemnia suscipiat alacriter pia mater ecclesia ave virgo deo digna ave dulcis et benigna obtine nobis gaudia quae possides cum gloria

Surge virgo et nostras sponso preces aperi tua vox est dulcis in aure domini quae pausas sub umbra dilecti ab aestu mundi transfer nos ad amoena paradisi

Pulchrae Sion filia pro mortali tunica agni tecta vellere et corona gloriae

Gloria patri et filio et spiritui sancto

Ave gemma claritatis ad instar carbunculi ave rosa paradisi more fragrans balsami Catharina virgo felix gloriosa meritis assistentes tuis festis caeli junge gaudiis

Adoretur virginum rex in saeculorum saecula virgini qui Catharinae contulit caelestia

Virgo sancta Catharina Graeciae gemma urbe Alexandria costi regis erat filia

Specie corporis decora nimis enituit sed fide pulchrior sponso superno placuit

Traditur ergo a patre doctoribus praecipius imbuenda literalibus studiis

Diffusa est*

Nobilis et pulchra prudens Catharina puella flagrat amore dei spernit vaga gaudia mundi

Cui rex carne pater fuerat reginaque mater

Martyrium sitiens libamina Caesaris horrens exclamat Christum praeter quem nil venerandum

Daemoniis plena sunt haec ait idola templi

Haec quinquagenos oratores superatos dirigit ad caelos aurum velut igne probatos

Efficiens testes fidei quos pertulit hostes

Gloria patri et filio et spiritui sancto

Cum esset adhuc in annis virgo puerilibus caris orbata parentibus mundi renuntiavit opibus

Maxentius instar impius cum idolorum cultibus puella voce libera haec sunt clamat daemonia et deum te Christe solum praedicat os virgineum

Caesar electos convocat rhetores et grammaticos adversus illam disputaturos quos vincens virgo Christi fidem docuit et martyres dignos deo exhibuit

Specie tua*

O quam felices per te sanctissima plures quos jubet occidi pro Christo turbidus hostis

Cum duce Porphyrio fit martyr Caesaris uxor

Impius hanc Caesar sisti jubet ante tribunal hanc ut pervertat sicut draco vel leo certat

Illa manet constans nec blanda nec aspera curans

Virgo flagellatur crucianda fame relegatur carcere clausa manet lux caelica fusa refulget fragrat odor dulcis cantant caeli agmina laudes

Sponsus amat sponsam salvator visitat illam

Gloria patri et filio et spiritui sancto

Gloriosam virginem tyrannus flagellari imperat et cruciandam fame in carcere recludi cui escam per columbam Christus facit ministrari

Illa deo dum agit gratias in tenebris lux emicat flagrat odor vincens balsamum adest et contio angelica lacero corpori caelestia adhibens medicamina

Cum coetu virgineo adveniens salvator sponsus sponsam pie visitat consolatur et roborat constans esto ait filia tecum ego sum nil paveas

Adjuvabit eam*

Horrendo subdenda rotarum machinamento virgo deum clamat de caelis angelus astat ecce repentinam dant plebsque rotaeque ruinam

Tamquam Chaldaeis quondam fornax Babylonis

Percusso gladio dat lac pro sanguine collo quam manus angelica sepelivit vertice Sina

Membris virgineis olei fluit unda salubris

O mater nostra ter sancta quaterque beata cum prece devota famulantum suscipe vota

Jam Christo juncta sponsoque tuo sociata

Gloria patri et filio et spiritui sancto

Aeternae virgo memoriae quam sibi despondit rex gloriae | virginis proles eximiae sponsusque virginis ecclesiae | tu gaudens hodie de dono gratiae | et cantas in caelo carmen laetitiae | te laudantes in terra respice | atque nostra clementer suscipe vota

Adducentur regi*

Passionem gloriosae virginis Catharinae devote plebs celebret fidelis quae sui memores deo commendat meritis et juvat beneficiis

Post plurima supplicia martyr alma ad decollandum est ducta ad caelum manus oculos tendens collum sub jugulo orat dans gloriam deo

Exspecto pro te gladium Jesu rex bone tu meum da paradiso spiritum et fac misericordiam meam agentibus memoriam

Vox de caelis intonuit veni dilecta mea veni intra thalamum tui sponsi tui quod postulas impetrasti pro quibus oras salvi erit

Quia devotis laudibus tui memoriam pie recolimus o beata Catharina ora pro nobis quaesumus

Jesu corona*

Veni sponsa*

Benedictus dominus rex caelestis qui per merita beatae Catharinae virginis medelam languidis praestat sanitatis ipsius corporis oleo feliciter perunctis

Prudens et vigilans virgo qualis es cum sponso illo qui te elegit de mundo quam mirabilis quanta luce spectabilis inter Sion juvenculas et Jerusalem filias gaudes in regno conjuncta dei filio

Voce cordis et oris in laudem summi redemptoris consurgat omnis fidelis cujus mediante gratia martyr et virgo Catharina facto clamore hora matutina exivit obviam Christo sponso qui sedes super cherubim cuncta videns in absconso ferens sertum rosae et lilii cum triumpho martyrii evasit minas tortorum o beata virgo Catharina ora jugiter pro reatibus supplicum tuorum