Lauda deum deum tuum devota Colonia qui te laude fecit dignam per undena milia virginalis coetus tibi missa de Britannia

Haec est dies*

Adducentur regi virgines post eam R. Proxime ejus offerentur tibi

Sponsus pulcher prae omnibus rex et sponsus virginum candidatis virginibus purpureis per gladium suum junxit conubium caeli jungendo civibus per passionis bravium super astris invexit

Exsultent omnes hodie collaudando dominum qui summae stola gloriae coetum sacratum virginum decoravit eximie

Diversis mundi partibus virgines quaeruntur virginis aspectibus Ursulae traduntur imbuendae

Undenis milibus consecratur coetus dei legibus semper meditatur

Ursula virgo regia moribus ornata vera docta scientia verbi spargit sata

Gaudent*

Adducentur regi virgines post eam R. Proxime ejus afferentur tibi

LACUNA

Elegit deus nova bella contra mundi principem pugnavit aetas tenella vitam ducens caelibem cum puellis et puella in hunc mundi tramitem

Mundum spreverunt quia gaudia caelica quaerunt sexum vicerunt quia fortes mente fuerunt

Inter sanctas speciosa fuit nomine Pinnosa virgo fragrans velut rosa et inter mundi spinosa odorem fudit fragrantem

Instruit haec mentes sociarum recta sequentes

Gloria patri et filio et spiritui sancto

Novum creans super terram rex creator omnium statum quendam supernorum repraesentat civium

Quae nec nubunt nec nubentur angeli sunt similes soli Christo sponso suo adhaerentes virgines

Exercitus virginum fortiter pugnantes ducem habent dominum ipsum imitantes sursum levant animum sursum contemplantes

Offerrentur virgines Christo regi domino R. In laetitia et exsultatione

Erubescite barbati vitiorum ense strati nam virginum candidati exercitus pugnaverunt moriendo quem vicerunt et palmam promeruerunt

Pectore sub fragili certaverunt corde virili

Iste mundo derelicto carnis rident jacula nescientes in delicto thorum absque macula totae pulchrae sponso Christo fide nubunt patula

Vitiorum calcato fomite angusti callis currunt in tramite

Fulget dies laetitiae virginum chorus hodie de mundo triumphavit quem super thronum gloriae totius rex justitiae Christus exaltavit

Virgineus coetus divino robore fretus coetibus angelicis*

LACUNA

(...) o madens ut flumine tot virginum dotatur agmine

Ex tunc humus ossium custos beatorum non admisit reliquum corpus defunctorum

Gaudet chorus caelestium consortio sanctarum in capite gestantium diadema praeclarum quibus non deest lilium nec purpura rosarum

Angelico more fulgent ingente decore

Haec est dies quam fecit dominus dies festus caelorum civibus in qua nova lux orta tristibus pax terrenis laus sit caelestibus

Puellari de triumpho laudem canunt angeli civitati pace data gaudent cives singuli

Gloria patri et filio et spiritui sancto

Prudentes virgines aptate lampades vestras R. Ecce sponsus venit exite obviam ei

Regnans regnat dominus mundo factus comminus carnis per materiam quam traxit de virgine virginum in agmine ludens multifariam

Omnis terra jubilet jubilando celebret festum virginale in quo canit curia virginum de gloria melos triumphale

Ante lucem dominum lucis coetus virginum exspectans cum lumine ad agni convivium dum est patens ostium intrat laeto carmine

Benedicant omnia sua deum opera bonus quia dominus angelorum ordines caelum tellus homines et quo his inferius

Novum canamus canticum laudantes caeli dominum qui facit mirabilia juvencularum virginum in tympano canentium laus ejus in ecclesia

Media nocte clamor factus est*

Hodierna laetitia mundus illustratur qua caelestis curia valde jucundatur virginitatis lilia sponsus amplexatur nuptiarum convivia celebrat nunc ecclesia thalamus locatur sponsus decorus gloria sponsis daturus praemia sponsis sociatur

LACUNA

Caelum resonet laudibus sacrum gerens tripudium cujus undenis milibus Christus auget consortium | Pulcher hodie virginum coetus migrat e saeculo adhaeret luci luminum fracto carnis ergastulo | Caeli venter eburneus decore pictus vario harum morte purpureus virginum candet lilio | Regali sata sanguine virgo procedit Ursula divino plena numine regis aeterni famula | Deposcit virgo virginum coetum meritis inclytum quarum est aput dominum merces magnumque meritum | Cui pater cum inclyto honor virtus et gloria et spiritu paraclito saecula sit per omnia amen

Hae sunt adolescentulae quae nimis Christum diligunt pro Christo Christi famulae corpus tormentis subigunt | Albis vallatae choreis caeli petunt vestigia in vestimentis aureis cum triumpho et gloria | O quam felix commercium pro terrenis caelestia contemptu mundialium caeli mercantur gaudia | Caelestis nempe curia gratanter his obsequitur sponsus decorus gloria sponsas sacras amplectitur | Harum placatus precibus cuncta depellat noxia nosque cum caeli civibus ad caeli ferat gaudia | Cui pater cum inclyto honor virtus et gloria et spiritu paraclito saecula sit per omnia amen

O dies dies virginum dies dierum gloria qua nova laus initium finem capit miseria | Quis digne fari poterit tot virginum praeconia solius cum supererit laudis referre debita | Hujus cohortis Ursula devota primiceria percepta mente sedula diva tractat mysteria | Instructis hinc sodalibus decursus sui termino velle fit unum omnibus virtutum jungi domino | Sit patri sponsi virginum ipsique sponso gloria cum spiritu qui gaudium hic donet et in patria amen

Agnum sponsum virginum regem regum dominum omnes adoremus | Virginum victorias et caelestes gratias laete decantemus | Haec sunt milia undena turba fortis et serena pugnans cum victoria | Rosae stellae margaritae rubent micant splendent vitae clara luminaria | Cum candore cum cruore virginali triumphali scandunt ad caelestia | Quam beatae quam sacratae luminosae quam formosae fulgent nunc in gloria | Spreta felix Ursula mundi regni insula et virili copula in caelo laetatur | Serto nitet regio in caeli palatio sponso regis filio Christo copulatur | Legit virgines decoras quas vocabat ad coronas baptizatae tollunt moras navigant coloniam | Cadunt oves trucidatae rubent rosae cruentatae intrant sponsae sic gemmatae in caelestem curiam | Nos thesaurum super aurum caput datum tam beatum habemus feliciter | Hanc regnantem triumphantem nobis datam advocatam laudemus perenniter | Et totalem virginalem hanc cohortem fide fortem canamus praeconiis | Ut jucundo corde mundo facto fine sine fine perfruamur gaudiis amen

Alleluia Surgens Christus de funere rosam legit et lilium cujus haec profert munere candorem et martyrium

Alleluia Chorus sacratus virginum gloriae post agnum sponsum dominum hymnos canunt laetitiae

Felix Thomas doctor ecclesiae lumen mundi splendor Italiae candens virgo flore munditiae bina gaudet corona gloriae

Exsultet mentis jubilo laudans turba fidelium errorum pulso nubilo per novi solis radium | Thomas in mundi vespere fundit thesauros gratiae donis plenus ex aethere morum et sapientiae | De cujus fonte luminis verbi coruscant faculae scripturae sacrae numinis et veritatis regulae | Fulgens doctrinae radiis clarus vitae munditia splendens miris prodigiis dat toti mundo gaudia | Laus patri sit ac genito simulque sancto flamini qui sancti Thomae merito nos caeli jungat agmini amen

Sertum gestans*

Ora pro nobis beate beate Thoma R. Ut digni efficiamur promissionibus Christi

Scandit doctor civis caelestium orbis decor dux lux fidelium norma limes lex morum omnium vas virtutum ad vitae bravium

Adsunt doctoris caelici Thomae festa sollemnia devotione supplici laudes promat ecclesia

Thomas insignis genere claram ducens originem subit aetatis tenerae praedicatorum ordinem | Typum gessit Luciferi splendens in coetu nubium plusquam doctores caeteri purgans dogma gentilium | Profunda scrutans fluminum in lucem pandit abdita dum supra sensus hominum obscura facit cognita | Sit paradisi fluvius quadripartite pervius fit Gedeonis gladius tuba lagenae radius | Laus patri sit

Doctor Thomas repletus gratia praemonstratus sacris oraculis mundi carnis hostisque vitia fugit exemplar datus saeculis

Mentis innocentia flosque puritatis exstiterunt praevia luci veritatis

Ope doctoris caelici tota gaudet ecclesia fulget ordo Dominici peculiari gloria

Amavit eum dominus*

Sancti viri verbum propheticum praemonstravit mundo mirificum sanctum Thomam doctorem caelicum sectaturum sanctum Dominicum

Nam vir sanctus hunc matri gravidae ducem prompsit doctrinae lucidae

Christi pia tractus dulcedine mundum linquens probatur turbine pugil fortis raptus de ordine vicit prorsus pulsa libidine

Erat pressa cruce mirifica renes cingit manus angelica

O anima sanctissima qua contemplante dulciter corpus linquebat infima stans sursum mirabiliter

Nullo prorsus fultus subsidio levabatur in raptus gaudio

Gloria patri et filio et spiritui sancto

O munus dei gratiae vincens quodvis miraculum pestiferae superbiae numquam praesensit stimulum

Prece curat socium febrem patientem et in oram vestium sanguine fluentem

Stella cadens emicat stuporem dans insolitum quae instantem indicat beati Thomae transitum

De excelsis fons sapientiae sancto Thomae infudit copiam tamquam flumen clarae scientiae qui susceptam refudit gratiam dum fluentis summae peritiae rigat totam sanctam ecclesiam

Stilus brevis grata facundia celsa clara firma sententia

Felix doctor cujus solatio angelorum servit attentio Petrus Paulus favent obsequio dei mater mulcet alloquio

Elevatus a terra cernitur crucifixus ei colloquitur

Sidus missum Thomae de superis novo signo divini muneris hunc caelestem demonstrat ceteris verbo vita doctrina litteris

Quam excelsus quem caeli praedicant quam praeclarus quem stellae indicant

Gloria patri et filio et spiritui sancto

Instante vitae termino vidit regna caelestia et revelante domino novit optata praemia

Seminavit hic largiter doctor virtuosus metit illic feliciter victor gloriosus

Sidus de nube trahitur de foeno flos eligitur adeps de carne tollitur dum Thomas caelo redditur

Scholas Thomae Paulus ingreditur sacra simul fantur mysteria digne tandem per raptum trahitur vir caelestis ad caeli praemia

Clamor fratris trinus emittitur doctor noster a nobis tollitur

Beati Thomae gloria divo fulsit miraculo dum odoris fragrantia mira fluxit ex tumulo qui nitens pudicia vixit absque piaculo

Hic speciali gratia lustrato mentis oculo celsa novit mysteria caeli doctus oraculo

Sertum gestans cum torque duplici cappa gemmis ornata cernitur ex monili fulgoris caelici lux emissa mundo diffunditur Augustinus fratri sic loquitur

Thomas mihi par est in gloria virginali praestans munditia

Gloria patri et filio et spiritui sancto

Rigans montes de superioribus tuis R. De fructu operum tuorum satiabitur terra

Adest dies laetitiae quo Thomas doctor inclytus fit civis caeli curiae bina corona praeditus

Aurum sub terra tegitur et lucerna sub modio sed virtus dei cernitur miraculorum radio

Alma mater ecclesia Christi fundata sanguine sceptra conscendit gaudia novi doctoris lumine

Pressus vi daemonii cito liberatur raptu mersus fluvii vitae restauratur

Tumor gulae pellitur leprosus sanatur caeco lumen redditur claudo gressus datur

Lauda mater ecclesia Thomae felicem exitum qui pervenit ad gaudia per verbi vitae meritum | Fossa nova tunc suscipit thecam thesauri gratiae cum Christus Thomam efficit heredem regni gloriae | Manens doctrinae veritas et funeris integritas mira fragrans suavitas aegris collata sanitas | Monstrant haec dignum laudibus terrae ponto et superis nos juvet suis precibus deo commendet meritis | Laus patri

Justus germinabit sicut lilium R. Et florebit in aeternum ante dominum

Viror carnis flore munditiae vigor vitae fructu justitiae splendor verbi dono scientiae te decorant stantem in acie te coronant in statu gloriae

Militantis doctor ecclesiae virginali florens munditia triumphantis optata curiae sancte Thoma largire gaudia

O Thoma laus et gloria praedicatorum ordinis nos transfer ad caelestia professor sacri numinis

Collaudetur Christus rex gloriae qui per Thomam lumen ecclesiae mundum replet doctrina gratiae

In medio ecclesiae aperuit os ejus et implevit eum dominus spiritu sapientiae et intellectus stola gloriae induit eum