Magno salutis gaudio laetetur omne saeculum Jesus redemptor omnium sanavit orbem languidum

Sex ante paschae ferias advenit in Bethaniam ubi pie post triduum resuscitavit Lazarum

Nardi Maria pistici sumpsit libram mox optimi unxit beatos domini pedes rigando lacrimis

Honor decus imperium sit trinitati unicae patri nato paraclito per infinita saecula amen

Hujus obtentu*

Maria unxit pedes Jesu et extersit capillis suis et domus impleta est ex odore ungenti

Armilla*

Magno salutis*

Specie tua*

Fidelis sermo et omni acceptione dignus quia Christus Jesus venit in hunc mundum peccatores salvos facere et qui nasci dignatus est de Maria virgine tangi non dedignatus est de Maria peccatrice haec est illa Maria cui dimissa sunt peccata multa quia dilexit multum haec est illa Maria quae resurgentem a mortuis prima omnium videre meruit dominum nostrum Jesum Christum quem pro nostris reatibus oret quaesumus in aeternum

Ploremus coram domino cum Maria ut veniam mereamur cum illa

Hujus obtentu*

Cum discubuisset in domo Simonis dominus Jesus mundi gloria mulier secum quae erat peccatrix nardi odorifera exhibuit ungenta

Secus pedes domini astans incessanter crine soluto diva vestigia osculatur lacrimis plena

Irrigabat igitur dominicos Jesu pedes fracto quoque alabastro praecipuis odoribus fragrabat domus omnis atque capillorum officio detergebat

Specie tua et pulchritudine tua*

Soror Marthae Maria sedens secus pedes domini audiebat verbum illius

Martha satagebat circa frequens ministerium at Maria

Martha stetit et ait domine non est tibi curae quod soror mea Maria reliquit me solam ministrare

Dic ergo illi ut me adjuvet

Cum venisset Maria ubi erat Jesus videns eum cecidit ad pedes ejus

Sicut peccatorum veniam sic fratri suo obtinuit vitam

Gloria patri et filio et spiritui sancto*

Simon autem intra se inquit si esset propheta sciret profecto quae et qualis esset quae tetigit eum quia peccatrix est

Et respondit dominus postquam veni in domum tuam non cessat crine fuso haec meos osculari pedes

Quoniam multum dilexeras dimissa scito tibi peccamina et fide quia polles sacra in pace remitto

Accepit Maria libram ungenti nardi pistici pretiosi et unxit pedes Jesu et capillis sui extersit

Stans retro ut peccatrix secus pedes domini hos lacrimis osculando rigavit

Dixit Jesus discipulis suis quid molesti estis huic mulieri bonum opus operata est in me

Quod habuit hoc fecit praevenit unguere corpus meum in sepulturam

Maria ut Jesum adesse audivit cito surgit et ad eum venit

In illo loco ubi Martha ei occurrit Maria

Gloria patri et filio et spiritui sancto*

Satagebat igitur Martha soror Mariae Magdalenae circa ministerium quae sedens secus pedes domini audiebat verba oris ejus

Non est Martha inquit tibi curae quod soror mea me reliquit solam ministrare jube illi ut me adjuvet

Et respondens dixit illi dominus unum extat certe necesse haec optimam sibi partem elegit quae non auferetur

Diffusa est*

Ubicumque praedicatum fuerit evangelium istud in universo mundo dicetur et quod haec fecit in memoriam ejus

Mittens haec ungentum hoc in corpus meum ad sepeliendum me fecit

Venit mane Maria Magdalena cum adhuc tenebrae essent ad monumentum

Igne amoris ejus accensa ardebat desiderio et recedentibus discipulis non recedebat

Armilla perforata est Leviathan maxilla per cujus foramen subtracta es o Maria adjuva ergo nos ut qui in illam incidimus peccando te imitantes valeamus subtrahi paenitendo

Divina misericordia te interveniente non solum in os Leviathan ire prohibeat sed ab ore ejus redire concedat

Gloria patri et filio et spiritui sancto*

Optimam partem elegit sibi Maria*

Conversus dominus ad Simonem dixit intravi in domum tuam aquam pedibus meis non dedisti haec mulier non cessavit lacrimis rigare pedes meos

Tanto namque amplius peccati rubigo consumitur quanto peccatoris cor majori caritatis igne crematur

Maria pio conjuncta Jesu osculando pedes illius et pie rigando terge crimina nostra

Quid peccatoribus laetius vel justis quid sperandum est securius non dedignatur dominus tangi peccatricis manibus ejusque rigari fletibus

Optimam partem elegit sibi Maria quae non auferetur ab ea in aeternum

Magno salutis*

Elegit eam deus et praeelegit*

O mundi lampas et margarita praefulgida quae resurrectionem Christi nuntiando apostolorum apostola fieri meruisti Maria Magdalena semper pia exoratrix pro nobis adsis ad deum qui te elegit

Conversus est*

Accepit Maria*

Stans retro*

Gloria patri et filio et spiritui sancto*

Magno salutis*

Elegit eam deus*

Gloriosa jam per orbem rutilat sollemnitas qua caelestem sumpsit vitam Maria Magdalena luce vernans speciosa turmas inter caelicas cujus nos benigne Jesu tuere praesidiis ut cum illa te laudare possimus per saecula