O dei sapientia attingens cuncta fortiter humani lapsus vitia sublevasti suaviter

Sumpsisti formam hominis in qua mortem susciperes ex alvo nascens virginis ne consors culpae fieres

Replens matrem dulcedinis dono dum alvo clauditur fit plena bonis inclytis ut stella fulgens oritur

Amoris dans indicia certa tam efficaciter tota nostra praecordia ad te traxisti dulciter

Aeterni patris ordine in templo virgo conditur ubi mira dulcedine contemplando perfruitur

Orationi dedita et divinis obsequiis a mundo prorsus abdita arcanis vacat studiis

O mira redundantia et grata data virgini quae cuncta sunt fragrantia et grata summo numini

Mens lingua caro spiritus sensus affectus actio electam monstrant caelitus te matrem dei filio

Gloria tibi domine qui natus es de virgine idem manens in numine patri cum sancto flamine amen

Fons hortorum redundans gratia mundum replens caeli muneribus mater dei foecundans omnia nos restaurans supernis sedibus florens hortus mox ab infantia admirandis fulsit virtutibus

Rore caelestis gratiae in utero perfunditur mater misericordiae ut stella splendens oritur

A piis parentibus votis impetrata templi penetralibus triennis est dicata

Tantilla puellula virtutis exemplum nulla freta gerula ascendit in templum

Erudita puella regia contemplatur mente caelestia caritate flagrant praecordia

Recolamus virginis inclyta ac miranda laudum praeconia infantilis aetatis merita et virtutis grata primordia

Radiat gratia jam in puella et sapientia fulget in parvula

Gloria patri et filio et spiritui sancto

O dei sapientia*

Ave Maria gratia plena*

Novae laudis adest festivitas grata mundo ac caeli civibus qua beatae Mariae sanctitas templo data est a parentibus ut olivae pinguis suavitas uberius redundet fructibus

Cum jucunditate*

Memento salutis*

Ave Maria*

Ave regina*

Dignare*

Votis et vocibus laudantes dominum instemus laudibus virginis virginum

Quem terra*

Nihil insolentiae virgo praetendebat nam lux sapientiae in ipsa fulgebat

In templo dei gradibus ter quinis erat aditus quos compositis gressibus ascendit fulta celitus

Ex affectu supplici deo famulatur sed ex gestu simplici cernentes hortatur

Speciosa facta*

Mente sancta fuit et humilis omni splendens ornatu gratiae virgo pia unde fit nobilis thronus dignus fit regis gloriae

Thronus eburneus cum auro fulgido venter virgineus cum corde provido

O quam puram quam sanctam decuit matrem esse dei quae deum genuit lacte quoque uberum aluit strinxit ulnis manibus tenuit

Tanto regi fit tam domestica quem vestivit humana tunica

Ordo rectus servatus noscitur dum Maria in templo conditur nam contemplans deo perfruitur sic ad alta mens ejus rapitur

Cum in mente verbi lux oritur digna verbi mater disponitur

Gloria patri et filio et spiritui sancto

Omni virtute praedita totum dat ad hoc studium ut tota deo subdita devotum det obsequium

Rex virtutum sibi mirabilem matrem fecit mitem et humilem omni quoque dote spectabilem

Desponsatur cor docile ad angeli colloquium mite praebet et humile prompta spondet obsequium

Dignare me laudare*

Imminente caeli dulcedine stans in templo virgo reficitur ejus quoque mens pulchritudine gratiarum ibi perficitur

Magna semper exercens opera gratiora meretur munera

Alma virgo propositum numquam nubendi statuit semperque dei placitum in hoc supposuit

Gratus virga Joseph flos emicat et hunc sponsum virginis indicat

Nuptam sic ex indicio floris et sancti spiritus in columbae mysterio Gabriel missus caelitus salutat magno gaudio quae concepit divinitus

In parentum manens hospitio invenitur a dei nuntio

Gloria patri et filio et spiritui sancto*

Flos in floris tempore ad locum floris mittitur sic de floris corpore gloriose concipitur

Jesus flos Maria virgula verque tempus floris flos Nazareth patria plena sunt decoris

Candens flos multiplicat virtute decorem conceptus glorificat Mariae pudorem

Post partum*

Arca dei in qua reconditur dulce manna cibus aethereus quo plebs dei sancta reficitur est Mariae venter virgineus

Thalamus regis gloriae quo jungitur ecclesiae

Mirabile deus commercium cum humano inivit genere suum nobis donans fastigium nostra dignans infirma sumere

Nam ut nostrum sanaret vitium sic amoris dedit indicium

Omnes gentes attendite ad tam pulchrum spectaculum deo gratias agite qui sic dilexit populum Mariae formam sumite quae virtutis est spectaculum

Virgo sancta templo data post haec facta est dei templum templum est plebs deo grata Mariae sequens exemplum

Gloria*

Elegit eam deus et praeelegit*

Lauda felix ecclesia almae matris infantiam cujus immensa gratia tibi paravit gloriam

In templo dei laribus virgo dedicata a supernis civibus gaudet visitata

Omnis ejus actio in deum tendebat toto vitae spatio meritum augebat

Quicquid egit paenitus et forma virtutis et doctrina spiritus et causa salutis

Quantum facultas sufficit laudent mentes piae nam omnis lingua deficit a laudibus Mariae

O gloriosa*

Elegit eam deus*

Benedictus virginis filius replens matrem misericordiae advocatam dans hanc propitius ne sit quisquam anceps de venia

Lauda*

Ave Maria*

In templo*

Speciosa facta*

Lauda*

Maria Jesse virgula de qua Jesus flos oritur spiritus sancti regula manens in templo regitur

Ubi divino dogmate de divinis instruitur omnium quoque charismate gratiarum imbuitur

Gloria*

O dei sapientia*

Elegit eam*

Oliva fructifera mater pietatis fugans mundi scelera stella claritatis per quam cuncta prospera dantur nobis gratis nos tandem in aethera transfer cum beatis