Adest dies celebris in qua gaudet virgo Mechthildis quam dominus de tenebris ad lucem vocavit et ad sublimitates caeli collocavit

Gaude beata Mechthildis abbatissa quia in extremis apparuit tibi soli virgo Maria

In memoria aeterna erit justa ab auditione mala non timebit

Gloria patri et filio et spiritui sancto

Gaude virgo beata quae a Christo domino sponso tuo coronata es gaude beata summo deo es electa quae es glorificata coram regibus et principibus qui pro te aquam ter mutavit in vinum meritis tuis ipsum pro nobis ora

Rex Christe domine in hoc festo Mechthildis hodie laudamus te

Felix namque in agone fuisti quae angelos bonos et malis vidisti bona et mala tua pensantes in te nullum malum invenientes

De quibus ridebas et fleveras de eorum insidiis non curabas quia in numero salvandorum fueras

Propterea gaude et laetabunda quia cum prudentibus virginibus es inventa ideo aperitur tibi janua vitae dum fatuis dicitur ite

Specie tua et pulchritudine tua R. Intende prospere

Tu digna fuisti quando dignitatem regi minis praelature suscepisti quam praesumebat non accipere quod papalis potestas mandavit facere

Tolle jugum Christum super te quia magis est oboedire quam sacrificare

Haec sapiens virgo fuit quam magis dominus dilexit super omnes puellas quia eam angelicis manibus suis sacris dapibus cibavit

Jam nunc et semper recumbens cum domino glorianter

O virgo deo devota et hominibus in Christo dilecta quae dum a conventu esset invitata quae semel de vino et de carnibus esset cibata et quae post mensam surgeret ad ecclesiam per angelos sola audiret quod omnibus tacere non potuit quia illis postmodum manifestari eam oportuit

O beata Mechthildis scias te hodie cibatam esse cum Elia in aere levato et non cum Esau reprobato

Gloria patri et filio et spiritui sancto

Dum de mensa surgent et gratias deo agerent sola virgo non cessabat a laude dei quia colloquia angelica percipiebat

Anima tua in gaudio liquefiebat quando in extremis Maria tibi apparebat

Caetus angelorum tibi obviavit quando Christus suo cibo te pavit

[O] lux magna a deo praeclara Mechthildis abbatissa que noviter emicuit que deo placavit quod sibi in sponsam prae multis elegit

Meritis celsam praemio beatam domini sponsam spiritalem matrem signis insignem canimus devoti sanctam Mathildim

Ecclesiarum decor et ornatus teneris annis domino sacratur hostia laudis pingue holocaustum sancta puella

Herilem prolem unctio magistra subdidit cunctis spiritus libertas eminens mundo domini amore dulce servivit

Thorum delicti nesciens migravit nunc quies illi tota cum supernis quos est hic exsul mente frequentavit corde dilexit

Haustu vinali abstinens beata bibit ter vinum caelitus ex aqua daemone mutam purgat et purgata loquitur muta

Illa dum orat subvenitur aegris reddita salus virtus manifesta gloriae Christi atque sanctitati virginis testes

Laudem virtutis virus dum vitaret homines fugit gloria praecurrens virginis sanctae prodidit secretum undique praesens

Trinitas sancta semper honoretur gaudium justis prece sit justorum venia nobis salus universis gloria deo amen

Vnuerschaydenleich auf ein gancz end und an alles geili