Tribulationes civitatum audivimus quas passae sunt et defecimus timor et hebetudo mentis cecidit super nos et super liberos nostros ipsi montes nolunt recipere fugam nostram domine miserere

Peccavimus cum patribus nostris injuste egimus iniquitatem fecimus

Nos alium deum nescimus praeter dominum in quo speramus qui non despiciet nos nec amovet salutem suam a genere nostro

Indulgentiam ejus fusis lacrimis postulemus et humiliemus illi animas nostras

Domine deus qui conteris bella ab initio eleva bracchium tuum super gentes quae cogitant servis tuis mala et dextera tua glorificetur in nobis

Allide virtutem illorum in virtute tua cadat virtus eorum in iracundia tua

Dominator domine caelorum et terrae creator aquarum et universae creaturae tuae exaudi orationem servorum tuorum

Tu domine cui humilium semper et mansuetorum placuit deprecatio

Vos qui in turribus estis aperite portas dominus omnipotens fecit virtutem et victoriam dedit de inimicis nostris

Laudate dominum deum nostrum qui non deseruit sperantes in se

Laudate dominum deum nostrum qui non deseruit sperantes in se et in me adimplevit misericordiam suam quam promisit domui Israel

Confitemini illi quoniam bonus quoniam in saeculum misericordia ejus

Benedixit te dominus in virtute sua qui per te ad nihilum redegit inimicos nostros ut non deficiat laus tua de ore hominum

Benedictus dominus qui creavit caelum et terram quia hodie nomen tuum ita magnificavit

Adonai domine deus magne et mirabilis qui dedisti salutem in manu feminae exaudi preces servorum tuorum

Benedictus es domine qui non derelinquis praesumentes de te et de sua virtute gloriantes humilias