Alme pater*

Tibi ergo pater confisi tuis toto corde suffragiis petimus adjuvari

Gloria patri et filio et spiritui sancto

Egregie dei antistes Dunstane offer pro nobis hostias placationum et timiamata precum sit his expiati te laeti sequamur ad sancta sanctorum ubi Christus pontifex introivit et te pontificali gloria coronavit alleluia

Alleluia jubilemus Christo regi in sacro transitu almi Dunstani alleluia

Dunstanus praesul inclytus claris ortus natalibus Christi tantum claritate cunctis elegit splendere alleluia

Infantiae primordia decora honestans indole gemmam nitentis fidei morum aptavit in signi alleluia

Quem crescentem virtutibus benigne respexit deus augens dona charismatum per incrementa temporum alleluia

Ecclesiae principatum sibi caelitus promissum magnis praecessit meritis atque virtutum titulis alleluia

Hic summista vatidicus sancto spiritu profluus plura praevidit ventura quae praedixit voce clara alleluia

In paradiso ecclesiae cum spiritali nectare fragrantiam caelestium suscitavit aromatum alleluia

Praesul Christi Dunstanus sanctis parentibus ortus claruit quorum animas inter angelos post excessum eorum videre promeruit alleluia

Sancti sanctum genuere et regi regum Christo obtulere

Pius adolescens Dunstanus florem juventutis flore induit virginitatis per quam complacuit et deo et angelis alleluia alleluia

Puri cordis munditiae casti corporis sociavit pudicitiam

Pretiosus vir domini Dunstanus splendidum ecclesiae ornamentum factus columna lucis effulsit quae erecta in caelum orbem terrae sustinuit alleluia alleluia

O robur apostolicae fidei plenum lumine caeli

In visione sancta apparuere beato Dunstano principes regni dei et judites saeculi singuli offerentes ei gladium et armaturam spiritus sancti alleluia alleluia

Petrus ergo et Paulus cum sancto Andrea effulsere eique gratiam apostolice benedictionis contulere

Gloria patri et filio et spiritui sancto

Dunstane pater inclyte divino zelo fervide adversus portas inferi praevalidus extitisti alleluia

Oris divini rumpheam in synagogam Satane et ipsum mundi principem vibrasti triumphalem alleluia

Martyr fuisti studio et sacerdos officio sancta sanctorum frequentans reisque deum complacans alleluia

Claves pater possedisti caelestis thesaurarii archanorum caelestium cunctis pandens introitum alleluia

Consummatus in gloria plausisti morte vivida qua laetaris patriarcha in gremio patriarche alleluia

Euge nunc Dunstane pie ex hominibus assumpte et archangelis dei conjuncte nostri pater memorare et jugiter miserere alleluia

Beatus Dunstanus exsilio pro justitia est ascriptus ubi crebra sanctorum consolatione a deo est relevatus alleluia

Cui pro veritate exsulanti per sanctam Andream apostolum astitit piissimus deus

Misertus dominus destitutae ecclesiae Dunstanum patrem cum gloria revocavit et ei patriarchatum primae metropolis Anglorum magnifice concessit alleluia

Respexit dominus populum suum cum beatum Dunstanum patriae redonavit

Caelestium contemplator Dunstanus angelica atque apostolica visione et visitatione dignissimus columbam a Joanne in Christi baptismate visam sibi in laetitia cordis sui exsultavit ostensam alleluia

Dunstanus columbae dei filius cordis munditiae et sanctae innocentiae deditus

Dunstanus archepiscopus sancto sopori deditus angelicis mulcebatur organis sic modulantibus kyrie eleison alleluia

Sancti spiritus psallebant in sublimi et dare modulando preces offerebant sancte trinitati

Gloria patri et filio et spiritui sancto

Translato ad caelestia Wentano praesule Aethelwoldo successorem caelesti monstratum oraculo pater Dunstanus elegit atque apostolica auctoritate pontificaliter infulavit alleluia

Transiens ex hoc mundo venerandus pontifex angelicis choris ducentibus migravit ad Christum qui ei factus est corona et perenne praemium alleluia

Cumque exitum suum dominicis muniret sacramentis translatus est ab angelis ad auctorem luminis

Exsultemus et laetemur in domino ecce beatus Dunstanus unus candidati gregis in albis agnum sequentis sanctus sanctus sanctus clamare non cessat alleluia alleluia

Conscriptus numero eorum qui secuntur agnum dei quocumque jerit

Translate ad caelestia benigne pater Dunstane suspirantes ad te filios noli deserere sed ad te transferre satage ut tecum coram Christo mereamur gaudere alleluia

Dum enim in corpore pereginamur a domino tuo quaesumus non destitutamur auxilio

Beatus es care dei Dunstane qui in cena nuptiarum agni discumbis qui gaudio domini tui laetus perfrueris gaudebis ergo cum angelis et in ligno vitae cum sanctis epulaberis alleluia

Ecce sicut sol in conspectu dei emicas ubi cottidie sanctus clamare non cessas

Gloria patri et filio et spiritui sancto

Decus praesulum Dunstanus futurorum divina revelatione praesagus patriarcharum ac prophetarum numero magnifice est sociatus alleluia

Qui in sancta ecclesia vices apostolorum exsequens in senatu eorum est aeternaliter in Christo vivens alleluia

Non est privatus martyrum Christi consortio qui hostia viva esse studuit spontaneo martyrio alleluia

In choro confessorum chohaeres Christi esse meruit qui in confessione sancti nominis ejus fidelis in saecula permansit alleluia

Vir angelicae puritatis Dunstanus agnum virginis inter virgines prosequitur quia custos perpetuae virginitatis virgo in aevum permansit alleluia

Amavit eum dominus*

Dilectus deo et angelis sanctus Dunstanus hodie carnis nexibus absolutus caelestia gaudens conscendit alleluia ubi sicut sol ex clariatate dei resplendet et diem aeternum aeternaliter possidet alleluia alleluia alleluia

Decus praesulum*

Egregie dei*

Non est privatus*

Vir angelicae*

Dunstanus praesul*

Haec tua sunt Christe magnalia alleluia quae in tuo Dunstano praedicamus gloriosa alleluia

Da nobis domine virtutum imitari exempla et meritorum insignia

Gloria patri et filio et spiritui sancto

Felix es dilecte deo et cunctis supernis virtutibus Dunstane felix es caelestis regni haeres dignissime ecce Christum ad quem suspirasti amplecteris ecce cum angelis ut desiderasti epularis intercede quaesumus pro nobis ut ea luce qua ante deum resplendes sidus aureum illustrentur in perpetuum anime supplicum tuorum alleluia