Tempora florigero rutilant distincta serenoque majore poli lumine porta patet

Altius ignivomum solem caeli orbita ducit qui vagus oceani exitque intrat aquas

Armatur radiis elementa liquantia lustrans adhuc nocte brevi tendit in orbe diem

Splendida sincerum producunt aethera vultum laeticiamque suam sidera clara probant

Lux gaudens vario fundit munuscula foetu cum bene vernales reddit et annus opes

Mollia purpureum pingunt violaria campum prata virent herbisque micat herba comis

Paulatim subeunt stillantia lumina florum floribus arridens gramina tincta suis

Tempore sub hiemis foliorum crine revulso jam reparat viridans frondea tecta nemus

Myrta salix abies corylus silex ulmus acernus plaudit quaeque suis arbor amena comis

Ad cantum revocatus avisque carmine clauso pigrior hiberno frigore muta fuit

Hinc Philomena suis attemperat organa cannis sicque repercusso dulcior aura melo

Namque triumphanti post tristia tartara Christo undique fronde nemus gramina flore favent