Factum est silentium in caelo dum draco committeret bellum et Michael pugnavit cum eo et fecit victoriam alleluia
Dum committeret bellum draco cum Michael archangelo audita est vox milia milium dicentium salus deo nostro
Dum proeliaretur Michael archangelus cum dracone audita est vox dicentium salus deo nostro alleluia
Angeli domini dominum benedicite in aeternum
Angeli archangeli throni et dominationes principatus et potestates virtutes caelorum laudate dominum de caelis alleluia
Michael Gabriel cherubim et seraphim qui non cessant clamare cottidie dicentes dignus es domine accipere gloriam alleluia
Michael archangelus venit in adjutorium populo dei
Laudemus dominum quem laudant angeli quem cherubim et seraphim sanctus sanctus sanctus proclamant
Gloriosus apparuisti in conspectu domini propterea decorem induit te dominus
Concussum est mare et contremuit terra ubi archangelus Michael descendebat de caelo
Insignes praeconiis almae tuae nobilitatis consonant voces collaudantes verbo supplici prosequamur ave inclyta martyr angelorum consors apostolorum socius prophetarum concivis et martyrum coheres sancte N. intercede pro nostra omniumque salute