Miserere mei deus miserere mei quoniam in te confidit anima mea

Paratum cor meum deus paratum cor meum cantabo et psalmum dicam domino

Exsurge gloria mea exsurge psalterium et cithara exsurgam diluculo

Adjutor meus tibi psallam quia deus susceptor meus es deus meus misericordia mea

Eripe me de inimicis meis deus meus et ab insurgentibus in me libera me

Exaudi deus deprecationem meam intende orationi meae a finibus terrae ad te clamavi domine

Dum anxiaretur cor meum in petra exaltasti me deduxisti me quia factus es adjutor meus

Deus in te speravi domine non confundar in aeternum in tua justitia libera me et eripe me

Esto mihi domine in deum protectorem et in locum munitum ut salvum me facias

Repleatur os meum laude ut hymnum dicam gloriae tuae tota die magnificentiae tuae noli me projicere in tempore senectutis cum defecerit virtus mea deus ne derelinquas me

Gaudebunt labia mea cum cantavero tibi et anima mea quam redemisti