Gloria patri et filio et spiritui sancto*

Omnipotens deus qui gloriosa bella certaminis ad immortalitatis triumphos martyribus contulisti da cordibus nostris dignam pro eorum commemoratione laetitiam ut quorum hic corpora pro amore complectimur eorum precibus adjuvemur

Adornatis cum oleo prudenter lampadibus regi sponso iubilantes occurramus

Venite adoremus regem regum cujus hodie ad aethereum mater virgo assumpta est caelum

Recreator et purgator purga mentem concinentem virginum praeconia auster veni flatu leni cordis venae fluant plenae per sancta suspiria

Britannorum antiquorum haec Ursula ex insula terminos egreditur cum qua tanta cohors sancta ut collecta sic electa ad palmam dirigitur

Hinc per Rhenum velis plenum Aggrippinam per divinam voluntatem adeunt spernunt mortem vincunt fortem spernunt mundum vas immundum ut regnent intereunt

Colonia sacra dia haec pignora sanctiora colligit et suscipit veneratur gratulatur quod ditatur et donatur his quas caelum recipit

Jesu bone audi pronae voces mentes concinentes cum sanctis martyribus purga munda et fecunda ut confortes et consortes facias caelestibus

Te laudamus praedicamus cum dilectis et electis benedicta trinitas serva rege tua lege quos creasti et salvasti gloriosa unitas amen

Fit porta caeli pervia referta plena gloria quae haec undena milia introduxit ad gaudia

Gaudent caeli palatia cum sanctis triumphantia gaudet felix ecclesia et orat patrocinia

O gloriosa civitas en sanguis et virginitas exornant te martyrio replent rosa lilio

Honor martyrum gaudium Jesu bonae laus spes fidelium per atra mortis pocula nostra solve piacula amen

Gaude caelestis curia quae virginum tot milia laureata suscepisti regi regum conjunxisti

Cujus ingressae thalamum per cruorem purpureum et castitatis lilia pingunt serenant omnia

Gaude regina virginum tibi dulcem exercitum tuus transmisit filius cui nil matre suavius

En ante thronum gloriae Sion resultant filiae hymnizantes jubilantes contemplantes adorantes

Debriantur suavitate contemplata majestate totae ardent in amore summo laudant cum dulcore

O Jerusalem filiae cum cantico laetitiae dilecto citharizantes conservate vos laudantes

Laus honor sponso virginum nunc et per omne saeculum qui nos sanctorum meritis caeli conjungat gaudiis amen

O felices virgines Hunnorum victrices quibus dum ad sanguinem usque restitistis oleo non vacuae nec segnes ut fatuae ad caelestes nuptias simul introistis

O beatae quae repente cum clamore veniente domino parate

Gloria patri et filio et spiritui sancto*

Adducentur regi virgines post eam R. Proxime ejus offerentur tui

O felix Germania tam decoro germine virginum ornata beata Colonia pretioso sanguine martyrum dicata vere juste tu laetaris quae thesauro super auro nobili ditaris

Regem regum dominum venite adoremus quia ipse est corona sanctarum virginum

Nova bella virginum dominus elegit ab extremis hominum quas sibi collegit

Pugnant sexu fragiles caelitus imbute sed insuperabiles fidei virtute

Beata militia quae pro rege gloriae de mundi malitia triumphavit hodie

Non armis sed animis istas bellatrices efficit unanimis gratia victrices

Fortiores hostibus feminae fuerunt quae contemptis omnibus omnia vicerunt

Unus enim spiritus acies caelestes fidei divinitus adunavit testes

Prudentes virgines R. Acceperunt oleum in vasis suis cum lampadibus

Deonoto fuit nata placens cunctis deo grata Ursula regalis cujus mire speciei plus mirandae fidei non erat aequalis

Regi magno pulchra nimis desponsatur dum instatur precibus et minis

Virgo desiderium habens castitatis meditatur et miratur rem quasi mysterium suae voluntatis

Deo secum disponente quod tractabat firma mente

Dum statutum nuptiis acceptis induciis tempus prorogatur pro undenis milibus votis consimilibus classis praeparatur

Duce regis filia haec ducuntur milia et unam sequuntur

Prudentes virgines aptate lampades vestras

Ecce sponsus venit exite obviam ei

Gloria patri et filio et spiritui sancto*

Sponsi currit in odore jucunda societas quam attraxit ex amore praegustata suavitas

Ut rosae tot milia rutilant cruore et florent ut lilia niveo candore

His caelestis paradisus adornata floribus angelorum mulcet visus delectat odoribus

Digne gaudent homines angeli laetantur dum victrices virgines caelo coronantur

Istae regi gloriae carae margaritae inventae sunt hodie longuis quaesitae

Quae dum piis mentibus oleum sumpserunt sponso cum prudentibus obviam iverunt

Media nocte clamor factus est R. Ecce sponsus venit exite obviam ei

Apparatu navium decenter expleto ad salutis bravium omnes cursu laeto virgines anhelant nec quod votis gestiunt aliis revelant

Ludere se simulant pelago vagantur invicem se stimulant pariter hortantur

Visionis Ursulae caelitus ostensae sacramento credulae simul inoffensae agone percurso confidunt participes fieri coronae

Caritate vulneratae mori Christo sunt paratae

Opportuni temporis sic hora captata terga findit aequoris juventus optata datis vento ratibus et velis inflatis

Advehuntur litori quo se Rhenus aequori Serenus infundit

Offerrentur virgines Christo regi domino

In laetitia et exsultatione*

Gaudeat ecclesia quam tot natalitia virginum fecundam insignes victoriae fragiles militiae faciunt jucundam

Tunc surrexerunt omnes virgines ille et ornaverunt lampades sua

Navigantes inde sursum contra Rheni tendunt cursum petentes coloniam per oraculum caelitus edoctae

Germaniam visurae suae locum sepulturae

Sanctis Romae visitatis repetunt Germaniam ubi cunctis jam vastatis Hunorum insaniam infusam reperiunt insuper Coloniam hostibus conclusam

Dira saevit vastitas his in malis virginalis non formidat castitas

Ad locum certaminis ductu Rheni fluminis subito feruntur datae porcis margaritae lupis oves non invitae passim feriuntur

Felix locus tam decora quem sacrarunt corpora

Isti flores hodie de terra succisi complantati liliis virent in deliciis florum paradisi

Electus ex milibus inter ista pascitur lilia dilectus

Gloria patri et filio et spiritui sancto*

Sol novus ab insula surgit occidentis dum virtutum Ursula fulget incrementis

Hae puellae regiae sponsi commensales agni tympanistriae angelis aequales

Muliebrem ad ornatum mundum acceperunt et ad verum et beatum regem intraverunt

Hi sunt flores venustatis quos spirantis gratiae ver et aestas caritatis produxerunt hodie

Istarum collegio caeli vernat regio fulcitur ecclesia paradisus fraglat mundus redimitur

Unguentum effusum nomen tuum domine

Ideo adolescentulae dilexerunt te nimis

Benedictus es rex gloriae qui palmam victoriae dedisti fragilibus et sexum sine viribus vincere fecisti demonis virtutem quarum piae precibus nobis supplicantibus tribuas salutem

O quam pulchra virginum casta generatio quas auctoris criminum non vicit ex actio

Quid in istis nisi choros videas castrorum quae non norunt viri thoros hostes vitiorum

In odore tuo Christe sic ad poenas currunt istae ut quasi deliciis gaudeant suppliciis

Gustaverunt et viderunt quod dulcis es domine et libenter impenderunt se pro tuo nomine

Istae sunt terribiles ut castrorum acies omnes ordinatae quae tonsarum similes ascenderunt sanguinis unda dealbatae

Ut columbae lacte lotae sic revera pulchrae totae

Gloria patri et filio et spiritui sancto*

O flos campi et lilium convallium Jesu Christe qui es sponsus et amor virginum quam jucundum interesse tuo semper conspectui quem laudantes prosequuntur virginales cunei ubi dulcis resonat melodia virgo Ursula simul cum Maria et frequenter ingeminat tibi Christe sit laus et gloria

Alleluia Hodie virginum chorus trucidatus est pro Christo sponso suo qui posuit animam suam pro ovibus suis et pro suo grege mori dignatus est

Jucunda deo laudatio sit in hac die sanctis consecrata | Quos coronat in caelo honore et gloria | Virginum sponsus qui pascit inter lilia | Quarum triumphis exsultat caelorum curia | Quarum coronis ornatur mater ecclesia | Beata vere quae tot electas virgines protulisti Britannia | Beata pio quae purpurata es earum cruore Colonia | Jam deo devota beati exercitus regina Ursula | Ex dictis erat angelicis martyrii virginum praescia | Quod dum cognoscunt sacrae virgines gaudio gaudent fundunt lacrimas adorant collaudant deum humili corde voce pia | Commendant Christo suas animas mundum contemnunt mente socia prudentes ornatae sumpto oleo lampadae fulgida | Vere mirabilis in sanctis deus virtutis tuae gratia | Hodie virginum qui coronasti undena clara milia | Hunni feroces gens barbarica cunctisque gentibus inimica | Agnas insontes gregis domini prosternunt rabie inaudita | Hic sanguinis pretiosi sanctarum fluxerunt flumina | Hic corpora jacent fusa munimen tuum Colonia | Solvitur obsidio libertas redditur hostibus fugatis urbem salvant martyrum merita | Laetare Colonia gaude Britannia quamque visitarunt votis et precibus urbs Romula | Exsultent sancti tot consortibus laetetur tot patronis ecclesia | Istarum venerantes merita precamur nostra laxari crimina | Sit tibi pater caelestis cum nato et spiritu sancto laus et gloria uni deo per saecula

Ecce*

Tristitia vestra*

Gaudete*

Pretiosa*

Narrabo*

Ecce*

Sanctifica nos*

Iste cognovit*

-os quos diu*

O crux splendidior*

Locutus est*

Audivi vocem*

Decantabat*