Beata nimium*

Isti sunt sancti*

Et facta est comes multitudo caelestis exercitus exanimi corporis beati Dionysii caput proprium deportantis laudans deum et dicens gloria tibi domine

Sanctus Dionysius qui tradente beato Clemente Petri apostoli successore verbi divini semina gentibus eroganda susceperat

Quo amplius gentilitatis fervere cognovit errorem illuc intrepidus et calore fidei armatus accessit et Parisius domino ducente pervenit

Non veritus incredulae gentis experiri feritatem quia virtutem suam praeteritarum poenarum recordatio roboravit

Tunc memorata civitas et conventu Germanorum et nobilitate pollebat quia esset salubris aere jucunda fluminibus fecunda terris arboribus nemorosa et vineis uberrima

Hunc ergo locum dei famulus elegit expetendum

Tantas per illum dominus dignabatur exercere virtutes ut rebellium corda non minus miraculis quam praedicationibus obtineret

Ecclesia illis necdum in locis erat et populus ille novam construxerat a quo officia servientium clericorum ex more constituit probatasque personas honoris secundi ordinis ampliavit

Cinctus ergo fide et misericordiam anteponens paulatim sociabat deo quos diabolo subtrahebat

Miroque modo inermi viro non valebat plebs armata resistere

Per beatum Dionysium fiunt divina mysteria per orationes ejus caeci illuminantur et natali ejus daemonia effugantur et infirmi sanantur

Peccatorum indulgentia donatur et reorum vincula relaxantur

Beatus Dionysius Rusticus et Eleutherius in hac ergo fidei constantia permanentes reddentes terrae corpora beatas animas caelo cum gaudio contulerunt

Beatorum anime Dionysii Rustici et Eleutherii relictis glebis domino placuerunt

Vir inclytus Dionysius martyr domini pretiosus succensus igne divini amoris constanter sustinuit supplicia passionis et per immanitatem tormentorum pervenit ad societatem angelorum

Cujus intercessio in perpetuum nobis obtineat veniam qui per tormenta passionis aeternam meruit palmam et sempiternam coronam

Hi sancti viri a beati Dionysii numquam sustinuerunt abesse praesentia quos in unum interrogatio percussoris invenit

Tali namque apud dominum meruerunt professione migrare ut amputatis capitibus adhuc putaretur lingua palpitans dominum confiteri

In hac ergo fidei constantia permanentes reddentes terrae corpora beatas caelo animas intulerunt

Beata nimium et deo nostro grata societas inter quos nec primus alter potuit esse nec tertius sed trinitatem confitentes trino meruerunt decorari martyrio

Eligunt tetris Sequanae profundisque gurgitibus martyrum corpora perdenda committere

In hoc ergo loco experiuntur infirmi quantum dei famulos conveniat honorari ubi recipit caecitas visum debilitas gressum et obstrictae aures recipere merentur auditum