Spiritus domini replevit orbem terrarum alleluia et hoc quod continet omnia scientiam habet vocis alleluia alleluia alleluia

Exsurgat deus et dissipentur inimici ejus et fugiant qui oderunt eum a facie ejus

Alleluia Emitte spiritum tuum et creabuntur et renovabis faciem terrae

Alleluia Spiritus domini replevit orbem terrarum et hoc quod continet omnia scientiam habet vocis

Confirma hoc deus quod operatus es in nobis a templo tuo quod est in Jerusalem tibi offerrent reges munera alleluia

Cantate domino psalmum dicite nomini ejus iter facite ei qui ascendit super occasum dominus nomen est illi

In ecclesiis benedicite deo domino de fontibus Israel

Regna terrae cantate deo psallite domino qui ascendit caelos caelorum ad orientem

Factus est repente de caelo sonus advenientis spiritus vehementis ubi erant sedentes alleluia et repleti sunt omnes spiritu sancto loquentes magnalia dei alleluia alleluia

Alleluia Non vos relinquam orphanos vado et veniam ad vos et gaudebit cor vestrum

Sancti spiritus adsit nobis gratia | Quae corda nostra sibi faciat habitaculum | Expulsis inde cunctis vitiis spiritalibus | Spiritus alme illustrator hominum horridas nostrae mentis purga tenebras | Amator sancte sensatorum semper cogitatuum | Infunde unctionem tuam clemens nostris sensibus | Tu purificator omnium flagitiorum spiritus | Purifica nostri oculum interioris hominis | Ut videri supremus genitor possit a nobis | Mundi cordis quem soli cernere possunt oculi | Prophetas tu inspirasti ut praeconia Christi praecinuissent inclyta | Apostolos confortasti uti tropaeum Christi per totum mundum veherent | Quando machinam per verbum suum fecit deus caeli terrae marium | Tu super aquas foturus eas numen tuum expandisti spiritus | Tu animabus vivificandis aquas foecundas | Tu aspirando das spiritales esse homines | Tu divisum per linguas mundum et ritus adunasti domine | Idolatras ad cultum dei revocans magistrorum optime | Ergo nos supplicantes tibi exaudi propitius sancte spiritus | Sine quo preces omnes cassae creduntur et indignae dei auribus | Tu qui omnium saeculorum sanctos | Tui numinis docuisti instinctu amplectendo spiritus | Ipse hodie apostolos Christi | Donans munere insolito et cunctis inaudito saeculis | Hunc diem gloriosum fecisti