In universa terra nomen tuum deus est mirabile qui servum tuum Oswaldum mirificasti in oris praedicatione

Amavit eum dominus*

Celebremus sollemniter Oswaldum festivum dei praeconem ut pium coram deo mereamur habere intercessorem

Dignissime namque devotis precibus tantum veneramus doctorem

Excellenti prosapia ortus Oswaldus puer clarae indolis nobilem lineam carnis prosecutus est nobilioribus actis

Patruum imitans Odonem archipraesulem virum summi honoris et sanctitatis

Auditor legis non surdus carnea spernens commoda post habuit obsequiis animae

Intente vigilans servivit nocte dieque

Cum non possent levare lapidem a multitudine in aedificium ecclesiae vidit beatus Oswaldus vividum daemonem super sedere quem expulit facta oratione et crucis signamine

Statimque pauci levavere quem antea multi non potuere

Gloria patri et filio et spiritui sancto

Oculi tui deus respexerunt in Oswaldum spiritu pauperem cujus justitias diligens in aequitate tua in caelis magnificas gloria tua divitem

Habitat deus Oswaldus tuus in tabernaculo tuo in aeterna quiete quia sine macula ingressus est serviens tibi in castitate

In virtute tua domine deus laetatus praesul Oswaldus vehementer exsultans super adepto desiderio cordis ejus in supernis mansionibus

Sacerdos domini Oswaldus verax corde dolum non egit in verbo unde requiescit domine deus in monte sancto tuo

Elegisti domine deus sanctum Oswaldum tibi in summum pontificem et assumpsisti eum ut habitans in atriis tuis videat tuam jucundissimam faciem

Bonum est domine tibi confiteri et psallere qui servum tuum Oswaldum donasti in caelis aeternae felicitatis munere

Justum deduxit*

Cum sancto sanctus habitans litterarum studiis operam dedit divinaeque legis scrutator summum doctrine apicem conscendit

Dei gratia doctor futurus malens prius fieri discipulus

Praeditus hinc juvenis legis sacrae documentis cum merito vitae doctor clarescit ubique

Divinis gradibus titulatus in ordine summus

Oswaldus bajulus crucis in compassione vulneratae caritatis ream animam absolve ab inferis per viscera misericordiae dei patris

Quae apparuit intercessori dicens se assumptam ab angelis in patriam lucis

Orbata pontifice Wigorna erga hunc dei conspirat tyronem hunc sibi praesulem hunc sibi petit doctorem

Tum rex tum proceres tum plebs universa fidelis

Gloria patri et filio et spiritui sancto

O insignissime pater et dux Anglorum Oswalde ante conspectum aeterni regis supplicum tuorum memorare cujus caritati nihil negabit quod institueris exorare

Posui adjutorium*

Aemula prosequitur viduata eboraca Wigornam ut fiat miro praesule digna viro

Et meritis tanti queat haec pia sponsa beari

Erectus in culmine summi honoris certavit in opere summi laboris ut et deo esset dignus in obsequio et utilis hominibus in ecclesiae officio

Perseverans usque in finem idoneus minister deo

Occasum tanti pontificis praedixerunt sancti praemonstrata sunt caelica signa qualiter ejus anima laetantibus angelis perducta est ad aetherea regna

De mundi hujus aerumna vocante eum dei clementia

O acceptabilem deo ministrum Oswaldum qui dum in pauperum obsequio Christum suscepit a Christo in aeternum convivium suscipi meruit cujus gratiae novitatem ignea desuper spera comprobavit

Nam ubi pauperum pedes lavit ibidem in odorem suavitatis domini exspiravit

Gloria patri et filio et spiritui sancto

Electus a deo pontifex Oswaldus suis temporibus sacerdotium condignis decoravit virtutibus

In cordis laetitia deo servivit beatus Oswaldus et ideo cum exultatione introivit in conspectu ejus

De luce sanctus praesul vigilavit lucentemque lampadam ferens venientem sponsum deum gaudens excoepit

Servi dei benedicite deum qui conservum vestrum Oswaldum tanto ditavit splendore virtutum

Exsultat in gloria magnificus praesul Oswaldus requiescens coram deo in divinis cubilibus

Alme pater*

Imitator domini Oswaldus dum pauperum pedes abluit et extersit felicem de hac vita exitum agens spiritum deo reddidit et ad cenam dei cum veste nuptiali in aeternum regnaturus introivit

Praesul insignis Oswalde anglorum pastor pie pro nostris erratibus jugiter intercede quo tecum semper valeamus vivere

Juravit*

O acceptabilem*

Ergo pater sancte meritis et nomine magne praesulis Oswalde clemens auditor adesto supplicibus servis pariter plorantibus assis conscia quos operis pravi mens anxia fundit ac praesta veniam fidei pietate delatam

Exsultet*

Imitator*

Simile est regnum caelorum sagenae*

Simile est regnum caelorum homini*

O quam pulchra est*

Gaudeamus universi ecclesiae filii gaudeat specialius nunc anglorum populus per beatum Gregorium conversus ad dominum cujus vita et meritum fulget in perpetuum

Propter intolerabiles*

Egregio beatitudinis tuae praeconio triumphat universalis ecclesia per te nobiliter instituta ave papa insignissime Romanorum decus Anglorum gloria Suessorum laetitia sancte Gregori interveni quaesumus pro nostra omniumque salute

Fulgebat*

Adoremus Christum regem confessorum dominum qui aeterna sanctum Gregorium coronavit gloria

Iste*

Gloriosa magnifici voluntas Gregorii fructum reddidit domino tempore continuo

Instabat enim precibus diebus ac noctibus constitutus a domino praedicator maximus

Erat ei pro omnibus cura grandis gentibus orabat specialius pro Anglis gentilibus

Exaudivit ergo deus orantem Gregorium et salvavit per baptismum Anglorum exercitum

Ecce gens quae prius monstra colebat et idola nunc orat ad templum dei in timore domini

Nunc ergo nomen domini laudemus mirabile qui direxit vias nostras ultra maris semitas

Fulgebat in venerando duplex decus Gregorio senatoria dignitas secundum genus saeculi voluntaria paupertas juxta praeceptum domini

Beatus vir qui metuit dominum in mandatis ejus cupit nimis

Propter intolerabiles rerum curas mundanarum recusabat praesulatum suscipere Romanorum sed victus prece populi suscepit jugum domini

Nec fecit proximo suo malum et opprobrium non accepit adversus proximos suos

Videns ergo vir beatus Anglorum casu pueros bene inquit bene Angli vultu nitent ut angeli oportet illis monstrari iter salutis aeternae

Quoniam domini est regnum et ipse dominabitur gentium

Dum oraret in obscuro servus dei latibulo lux immensa super eum resplenduit post triduum hoc signo cunctis proditus papa urbis effectus

Quia misericordiam et veritatem diligit deus gratiam et gloriam dabit dominus

Dominus de summo caelo per sanctum Gregorium ditavit fidei dono Anglorum collegium

Quoniam non fuit dolus in sancto Gregorio ideo nunc requiescit in pace cum domino

Quomodo multiplicasti tuam deus gratiam per beatum Gregorium gentem salvans Anglicam nunc praetende jam fideli hanc misericordiam ut possit servare tuam devota justitiam

Beatus Gregorius a diebus juventutis suae deo studuit sine intermissione placere

Carnales viriliter edomuit voluptates et diabolicas expugnavit illusiones

Ab adolescentia pugnando contra vitia fatigabatur gravi ciborum inaedia

Justum deduxit dominus*

Orante beatissimo ad dominum Gregorio Sanata est plebs romana a peste inguinaria

Multum enim valet deprecatio justi assidua

Vere felicem praesulem verae fidei doctorem quo petente panis Christi formam accepit digiti ad firmandam plebis fidem versus incruentam carnem

A domino factum est istud et est mirabile in oculis nostris

Laudabile miraculum per beatum Gregorium indulsit deus omnium trajani quippe animam jam olim poenis traditam placatus sancti lacrimis revocavit ab inferis

Omnia quaecumque voluit dominus fecit in caelo et in terra et in mari et in omnibus abyssis

Hodie praeclarissimus deo dignus episcopus et Anglorum apostolus a terrenis separatus conjunctus est caelestibus cum gloria Gregorius

Ecce vere Israelita in quo dolus non est

Sancti spiritus dono ditatus gloriosus pontifex Gregorius sedem rexit apostolicam et ad fidem Christi gentem convertit Anglicam

Posui adjutorium*

Iste est de primoribus theologis unus Gregorius papa inclytus Romulea urbe editus cujus doctrina fulget ecclesia ut sol et luna

Iste est Gregorius praesul meritis et nomine dignus

Hic in annis adolescentiae deo coepit devotus existere et ad supernae vitae patriam totis desideriis anhelare

Hic itaque non solum spectabili senatorum prosapia verum etiam religiosam vitam duxit

Electus et dilectus domini Gregorius tandem post triduum invenitur capitur trahitur consecratur ac papa urbis efficitur

Tertia jejunii nocte columna lucis super eum emissa invenitur

O pastor apostolice o defensor ecclesiae Gregori confessor Christi eruditor Augustini praesta nobis auxilium per dominum Jesum Christum

Memor esto congregationis tuae quam adquisisti gratia Christi

Gloria patri et filio et spiritui sancto